Həmin kafe Bakı şəhərinin Dənizkənarı Parkının ərazisində yerləşir. Kafe 1962-ci ildə memar Vadim Şulqinin layihəsi əsasında inşa olunmuşdur. Bura, həmçinin “Balıqqulağı” və “Bakı pavilyonu” kimi tanınmışdır.
Kafe Bakı şəhərinin o zamankı meri Əliş Ləmbəranskinin təşəbbüsü ilə tikilmişdir. Mövcud şayiəyə görə, Əliş Ləmbəranski həmin illərdə Skandinaviya ölkələrində məzuniyyətdə olub. Bakıya qayıdan mer 1958-ci ildə ispan memarı Feliks Kandela tərəfindən Mexiko şəhərində inşa edilmiş “Los Manantiales” restoranının şəklini gətirir və Bakıda ona oxşar bina tikdirməyə qərar verir. [https://azerhistory.com/?p=5071]
Tikilinin konstruktoru dövrün peşəkarlarından olan N.Nikonov seçilmişdir. 1962-ci ildə kafe hazır olur. Bina balıqqulağı şəklində inşa edilir. İlk illərdə kafe Xəzər dənizinin sahilində yerləşirdi. 1970-ci illərdə dəniz səviyyəsinin azalması nəticəsində “Mirvari” quruda qalır. [Бретаницкий Л.С. Баку: архитектурно-художественные памятники. Москва-1970]
Tikili məşhurluq qazanır və bulvarın rəmzinə çevrilir. Bakıya səfər edən xarici jurnalistlər və rəssamlar öz reportaj və rəsmlərində “Mirvari”ni təsvir edirdilər. Bakı pavilyonunun məşhurluğu o qədər yüksək idi ki, oxşar kafe on ildən sonra Sovet Qırğızıstanının paytaxtı Frunze (indiki Bişkek) şəhərində peyda oldu. [http://www.window2baku.com/jemchujina.htm]
2008-ci ildə “Mirvari” kafesində təmir-bərpa işləri görülüb. Bərpa işləri Almaniya mütəxəssisləri ilə birgə hazırlanan layihəyə əsasən edilib. [Rəhman Salmanlı. Milli Park görünüşünü dəyişir. Azərbaycan.-2009.-1 may.-S.5.]
