Azərbaycan Atletika Federasiyasının Qadınlar Komitəsinin sədri Elvira Salamova əri tərəfindən aldadılıb. Bu haqda bu gün, 19 may tarixində Qafqazinfo məlumat verib.
Bakı Ağır Cinayətlər Məhkəməsində elan olunan hökmə əsasən, zərərçəkmişlərə ümumilikdə 1 milyon manata yaxın ziyan vuran İqbal Həsənliyə 8 il 6 ay həbs cəzası verilib.
Araşdırmalara əsasən, Həsənli müxtəlif dövrlərdə arvadı və qohumları da daxil olmaqla 8 tanışını aldadıb. 49 yaşında o, Elvira Salamova ilə ailə qurub. Xanıma Dubayda böyük biznesinin olduğunu, qızıl və brilyant əşyaların satışı ilə məşğul olduğunu bildirib. Salamovanı və kürəkənini aldadaraq onlardan guya şirkəti qurmaq üçün 55.000 manat alıb.
Bir neçə tanışını “BMW” markalı avtomobillərin işlənmiş ehtiyat hissələrini Azərbaycana gətirib satmaqla gəlir əldə edəcəklərinə inandıraraq onlardan 200.000 manat pul alıb. Digər insanlardan o, müxtəlif bəhanələrlə 170.000, 272.000 və 51.000 manat pul alıb.
Məhkəmənin hökmü ilə 8 il 6 ay həbs cəzası ilə yanaşı, İqbal Həsənlinin üzərinə 3 zərərçəkmişə ümumilikdə 250 min manatın ödənilməsi qərara alınıb.
