Azərbaycanda mənzil alanların böyük əksəriyyəti daha münasib qiymət seqmentinə üstünlük verir.
"Daşınmaz Əmlakın Dövlət Kadastrı və Reyestri"nin məlumatına görə, 2025-ci ildə satılan mənzillərin 84,8 faizi 200 min manatdan aşağı qiymətə alınıb. Ötən il 1 milyon manatdan baha 42 mənzil satılıb və onların hamısı Bakıda yerləşib. 500 min–1 milyon manat aralığında satılan 373 mənzilin də hamısı paytaxtın payına düşüb.
Bəs milyonlarla manatlıq mənzilləri fərqləndirən nədir?
1 kvadratmetr 14 min manata qədər
Daşınmaz əmlak üzrə ekspert Firdovsi Xəlilovun sözlərinə görə, premium seqmentdə ən bahalı ərazilərdən biri Ağ Şəhərdir. Burada 1 kvadratmetrin qiyməti 4 min manatdan başlayaraq 14 min manata qədər yüksəlir. Nərimanov, Elmlər Akademiyası, Sahil, Xətai, 28 May, Port Baku və Bayıl kimi ərazilərdə də premium mənzillərin qiymətləri yüksəkdir.
Premium mənzilləri bahalaşdıran əsas amillərdən biri tikinti keyfiyyəti və şəhərsalma standartlarıdır. Yeni layihələrdə sıxlığın azaldılması, gün işığının düzgün hesablanması, fasad və izolyasiya sistemləri kimi detallara xüsusi diqqət yetirilir.
Bundan başqa, 2020-ci ildən şəhərsalma tələblərinin sərtləşdirilməsi tikinti əmsallarını azaldıb. Əvvəllər bir hektarda 60–65 min kvadratmetr tikmək mümkün olduğu halda, hazırda bu göstərici 20–22 min kvadratmetrə düşüb. Bu isə torpaq və tikinti xərclərinin hər kvadratmetr üzrə artmasına səbəb olub.
Premiumun əsas ünvanları
Ekspert Elnur Azadovun sözlərinə görə, Bakıda premium layihələrin əsas mərkəzləri Ağ Şəhər və Sea Breezedir. Sea Breeze-də 20-dən çox layihə həyata keçirilir və rəqabət yüksək olduğundan bəzi mənzillər ilkin ödənişsiz şərtlərlə də təklif olunur.
Premium yaşayış komplekslərində qiymətlər təxminən 1 800–2 000 dollardan başlayır. Lakin həqiqi premium anlayışında yalnız bahalı təmir deyil, məxfilik, az sıxlıq və komfortlu yaşayış mühiti də əsas meyarlardır. Məsələn, Ağ Şəhərdə bəzi binalarda bir mərtəbədə cəmi 3–5 mənzil yerləşir.
Milyonluq mənzillər necə satılır?
1 milyon manatdan baha mənzillərin satışı kütləvi bazardan fərqlənir. Onların böyük hissəsi elan saytlarına çıxarılmır, VIP alıcı bazaları və xüsusi rieltor şəbəkələri vasitəsilə təqdim olunur.
Adi mənzillər bir neçə aya satıldığı halda, milyonluq mənzillərin bazarda qalma müddəti 6 aydan 2 ilə qədər uzana bilər. Qiymətlər fərdi danışıqlarla müəyyənləşdiyi üçün bu seqmentdə ciddi endirimlər də mümkündür.
Mənbə: kaspi.az
