Bu gün Azərbaycanın görkəmli teatr və kino aktyoru, Əməkdar artist Hamlet Qurbanovun doğum günüdür.
1938-ci il oktyabrın 13-də görkəmli aktyor Ağadadaş Qurbanov və opera müğənnisi Gülxar Həsənovanın ailəsində dünyaya gələn Hamlet Qurbanov istedadı ilə tamaşaçıların sevgisini qazanıb.
O, mərhum aktrisa Gülşən Qurbanovanın ata bir, ana ayrı qardaşıdır.
Uşaqlıqdan çətinliklərlə üzləşən Hamlet Qurbanov valideynlərinin ayrılmasından sonra anasının himayəsində böyüyüb.
1961-ci ildə Azərbaycan Dövlət İncəsənət İnstitutunda böyük rejissor Mehdi Məmmədovun kursunu bitirib.
1957–1992-ci illərdə Milli Dram Teatrında çalışan aktyor səhnədə yaddaqalan obrazlar yaradıb.
Teatrda İldırım Bəyazid ("Topal Teymur"), kinoda isə Qıpçaq Məlik ("Dədə Qorqud") obrazları ilə tanınıb.
Həmçinin "Yollar görüşəndə", "Evləri köndələn yar", "Atayevlər ailəsi" və digər televiziya tamaşalarında maraqlı rollar ifa edib.
Cəmi 57 il ömür sürən Hamlet Qurbanov yaratdığı obrazlarla Azərbaycan teatr və kino sənətində silinməz iz qoyub.
