Ali Məhkəmədə qəsdən sağlamlığa ağır zərər vurmada və xuliqanlıqda təqsirləndirilən Əkbər İmranovun (ad, soyadı şərtidir) kassasiya şikayətinə baxılıb.
Hadisə 2025-ci ildə Abşeron rayonu, Mehdiabad qəsəbəsində yerləşən "Gənclər şəhərciyi" yaşayış massivində baş verib.
İttihama görə, Əkbər İmranovun dayısına məxsus "laqonda" (ovuc daşlayıcı) elektrik cihazlarının təmiri sexində Əmir İslamov (ad, soyadı şərtidir) tərəfindən təmir olunub. Təmirin keyfiyyətindən narazı qalan tərəf sexə gəlib və aralarında mübahisə yaranıb. Mübahisə zamanı Əmir təqsirləndirilən şəxsi təhqir edib.
Bundan sonra Əkbər yaxın qohumları ilə birlikdə sexin qarşısına qayıdıb. O, metlax parçası ilə Əmirin boynunun arxa nahiyəsinə, daha sonra isə dəmir çəkiclə başına zərbə vurub.
Nəticədə zərərçəkmiş açıq kəllə-beyin travması və digər həyati təhlükəli xəsarətlər alıb.
Sumqayıt Ağır Cinayətlər Məhkəməsinin hökmü ilə Əkbər İmranov 4 il müddətinə azadlıqdan məhrum edilib. Sumqayıt Apellyasiya Məhkəməsi şikayəti təmin etməyib. Ali Məhkəmə də kassasiya şikayətini təmin etməyərək əvvəlki qərarı qüvvədə saxlayıb.
