2024-cü il ilə vidalaşırıq. İlin bitməsinə sayılı günlər qalıb. 2024-cü il Azərbaycan üçün məşhurların itkisi ilə müşayiət olunub.
Bakuplus.az-ın əməkdaşı bu il vəfat edən tanınmışların siyahısını hazırlayıb.
Siyahını təqdim edirik:
Tanınmış qarmon ifaçısı, Əməkdar artist Gülbahar Şükürlü yanvarın 5-də vəfat edib. 62 yaşlı tanınmış qarmon ifaçısı xərçəng xəstəliyindən əziyyət çəkirdi.
7 mart 2009-cu il Azərbaycan Respublikasında mədəniyyət sahəsində xidmətlərinə görə “Azərbaycan Respublikasının əməkdar artisti” fəxri adına layiq görülüb.
Məşhur müğənni, Əməkdar artist Aygün Hümmətova (Bəylər) yanvar 7-də Türkiyənin paytaxtı Ankara şəhərində dünyasını dəyişdi. 48 yaşlı sənətkar uzun müddət idi ki, xərçəng xəstəliyindən əziyyət çəkirdi. Azərbaycan Respublikasının əməkdar artisti adına 2002-ci ildə layiq görülüb.
Tənqidçi, ədəbiyyatşünas, tərcüməçi Çingiz Hüseynov yanvarın 8-də 94 yaşında vəfat edib. O, 1989-cu ildə Azərbaycan SSR əməkdar incəsənət xadimi adına layiq görülüb.
Əməkdar artist Niftulla Əsgərov uzun sürən xəstəlikdən sonra yanvarın 22-də vəfat edib.
Tanınmış baletmeyster, Xalq artisti Rəfiqə Axundova uzun sürən xəstəlikdən sonra fevralın 6-da 92 yaşında vəfat edib. 1970-ci ildə Azərbaycan SSR xalq artisti adını alıb.
Azərbaycanın Xalq yazıçısı Mövlud Süleymanlı fevralın 22-də vəfat edib. O, 81 yaşında bu dünya ilə vidalaşıb. Yazıçı Əməkdar incəsənət xadimi (2003), Azərbaycan xalq yazıçı (2006) adlarının sahibi, Şöhrət və Şərəf ordenlərinin laureatıdır.
Aktrisa Naibə Əlibəyova martın 6-da dünyasını dəyişib. O, xərçəng xəstəliyindən əziyyət çəkirdi.
Tanınmış xanəndə, əməkdar artist Sahibə Əhmədova martın 16-da vəfat edib.
Əməkdar artist Rahib Əliyev martın 28-də dünyasını dəyişib. 2006-cı ildə Azərbaycan Respublikasının əməkdar artisti adına layiq görülüb.
Sabiq deputat, Milli Məclisin Əmək və sosial siyasət komitəsinin keçmiş sədri Hadı Rəcəbli aprelin 17-də dünyasını dəyişdi. On birinci çağırış Azərbaycan SSR Ali Sovetinin, birinci, ikinci, üçüncü, dördüncü və beşinci çağırış Azərbaycan Respublikası Milli Məclisinin deputatı olub.
Tanınmış müğənni, Əməkdar artist Cavanşir Məmmədov aprel 20-də, 70 yaşında vəfat edib. Cavanşir Məmmədov dövlət başçısının müvafiq sərəncamı ilə 2005-ci ildə Əməkdar artist fəxri adına layiq görülüb.
Azərbaycanın ilk İnsan Hüquqları üzrə müvəkkili (Ombudsman) Elmira Süleymanova aprelin 25-də dünyasını dəyişib. Kimya Elmləri doktoru (1980), professor (1981), Azərbaycan Respublikası Prezidentinin fərdi təqaüdçüsü (2020-ci ildən), alim, dövlət xadimi və ictimai xadimi olub.
Azərbaycan Respublikasının sabiq müdafiə naziri Dadaş Rzayev mayın 27-də vəfat edib.
Milli Məclis Aparatının sabiq rəhbəri Səfa Mirzəyev iyulun 22-də uzun sürən xəstəlikdən sonra dünyasını dəyişib. 1992-ci ildən Milli Məclis Aparatında işləyib. 6 fevral 1997-ci ildən isə Milli Məclis Aparatının rəhbəri olub.
Tarixçi-professor Nəsiman Yaqublu avqustun 25-də ağr yol-nəqliyyat hadisəsində vəfat edib. Bakı Dövlət Universitetində müəllim işləyən professor Zəngilan-Qubadlı dairəsindən deputatlığa namizəd idi. Zəngilandan seçicilərlə görüşdən qayıdırkən idarəetməni itirərək maşını yol kənarına aşırıb.
Bakı Metropoliteni”nin sabiq rəisi Tağı Əhmədov oktyabrın 18-də dünyasını dəyişib.
Nəzrin Vahid
