"Məsələni böyütmək istəmirəm, yaxud da qarşı tərəfi gözdən salmaq niyyətim yoxdur".
Bunu Bakuplus.az-a açıqlamasında aktyor Cavidan Kəsəmənli deyib.
O, son günlər əmisi Rəşad Kəsəmənli ilə aralarındakı qalmaqaldan danışıb:
"Atamla uzun müddət münasibətim olmayıb. Bunun da səbəbkarı əmimdir. Ailədaxili məsələlər olduğu üçün bu barədə ətraflı danışmaq istəmirəm. Çox təəssüflər olsun ki, son illər baş verən hadisələrdə əmim doğmalığını hiss etdirmədi. Bütün özəl günlərimdə özünü uzaq tutdu. Əsas məsələ isə övladım olandan sonra başladı. Həmin dövrdə heç nə ilə maraqlanmadı. Övladım dünyaya gələn gün özü də bilirdi ki, mən təkəm, atam yanımda yoxdur. Ancaq yenə də övladımı qarşılamağa gəlmədi. Halbuki buna səbəb olacaq heç nə yaşanmamışdı. Özü də mənim ilk övladım idi.
Mən oradan tək çıxdım, yanımda yalnız dostlarım vardı. Artıq həmin vaxt müəyyən soyuqluq yaranmışdı. Buna baxmayaraq, oğlumun bir yaşını qeyd edəndə onu da dəvət etdim. Ancaq nə əmim özü gəldi, nə də övladlarını göndərdi. Bu da o deməkdir ki, mən səni saymıram. Sonradan oğlumla paylaşdığı şəkilləri görənlər deyə bilər ki, gəlib uşaqla maraqlanıb. İnanın ki, həmin şəkillər publikaya göstərmək üçün idi və şəkildən artığı olmayıb. Yenə də mən aramızdakı soyuqluq bəlli olmasın deyə məsələni uzatmadım. Əgər qalmaqal arxasınca qaçsaydım, elə həmin vaxt bunu edərdim. Ümumiyyətlə, bu hadisə baş verənə qədər onun haqqında heç yerdə bir kəlmə pis nəsə danışmamışam. Əgər əksini iddia edirsə, mən onunla söhbət etməyə hazıram".
Cavidan əmisinin sözügedən statusu aralarındakı mübahisədən sonra yazdığını bildirib: "Problemin kulminasiyası isə bir neçə gün öncə oldu. Söhbət əsnasında o məni təhqir etdi. Əlimdə səs yazısı da var. Mən də cavab verdim ki, bir də mənimlə belə danışma. Artıq 31 yaşım və bir övladım var. Üzərimdə heç bir haqqı olmayan insanın mənimlə bu tonda danışmağı qüruruma toxundu. Bu söhbətdən sonra da əmim belə bir paylaşım etdi. Halbuki mənim məsələni ictimailəşdirmək kimi bir fikrim yox idi.
Sadəcə onun yazdığına cavab vermək məcburiyyətindəydim. Biz eyni sferadayıq. O, elə bir çağırış edəndə ortaq tanışlarımızda avtomatik olaraq mənə qarşı antipatiya yaranır. Əgər buna cavab verməsəydim, deyəcəkdilər ki, yəqin Cavidan gözü kölgəli olduğu üçün susur. İstənilən halda o özü də bilir ki, söhbət dərinləşsə, uduzan tərəf mən olmayacam".
Qarşı tərəflə əlaqə saxlasaq da, Rəşad Kəsəmənli bu haqda danışmaq istəmədiyini bildirdi.
Qeyd edək ki, Rəşad Kəsəmənli mərhum şair Nüsrət Kəsəmənlinin oğlu, Cavidan isə nəvəsidir.
