Aygün Kazımovanın yeni “Can ol” mahnısı “Youtube”da 3 həftə ərzində 10 milyondan çox izlənərək böyük uğura imza atıb. Ancaq mahnının ikinci bəndindəki “yay çıxıbdır oxdan” misrası bəzi dinləyicilər arasında müzakirələrə səbəb olub.
Bakuplus.az xəbər verir ki, sözlərin müəllifi “YAP10” ləqəbi ilə tanınan Zamiq Əliyev mövzuya aydınlıq gətirmək üçün şəxsi “Instagram” hesabında açıqlama yayıb.
Reper bildirib ki, mahnının sözləri məcazi məna daşıyır və burada reallıq yoxdur:
“Hər kəsə salam. Mən Zamiq Əliyev, bəstəkar, yazar, rep təxəllüsüm YAP10. Son günlər aktual olan “Can ol” mahnısının bəndinin sonuncu misrasına görə bu videonu çəkməyə özümə borc bildim. Uzatmadan məsələyə aydınlıq gətirmək istəyirəm. Ədəbiyyatımızda fikirlərimizi daha dolğun, daha qüvvətli ifadə etmək üçün təşbeh, mübaliğə, epitet və s. bədii təsvir vasitələri var. Mən burada sətrə “sanki” sözü ilə başlamışam: “Sanki dərmişəm qızıl alma bağdan, çoxdan yay çıxıbdır oxdan”. Yəni reallıqdan söz gedə bilməz. Necə ki qızıl alma yoxdur, onu bağdan dərmək mümkün deyil. Və yay da oxdan çıxmır, ox yaydan çıxır”.
Söz yazarı onu başa düşməyən dinləyiciləri qınayıb:
“Bunun elə gözəl fərqindəyəm ki, sizin deməyinizə ehtiyac yoxdur. Siz, məncə, bunu başa düşməliydiniz. Yenə də deyirəm, həmin sətirdə mübaliğədən, məcazdan istifadə olunub. Mübaliğəni bilməyən insanlara onu demək istəyirəm ki, mübaliğə bir fikrin şişirdilməsinə deyilir. Burada heç bir reallıqdan söhbət gedə bilməz.
Son olaraq onu demək istəyirəm ki, mən bu işdə yeni deyiləm, xalq artistləri ilə çalışmışam. Aygün Kazımova, Zamiq, Miri Yusifin bir çox mahnıları mənə aiddir. Ümidvaram ki, ağlınızda olan suallara cavab verə bildim. Təşəkkür edirəm. Minnətdaram”.
