Aktyor Azər Aydəmir Vəkillər Kollegiyasının “Əqrəb Mövsümü: İki dünya bir olsa da” serialına xəbərdarlıq etməsi ilə bağlı açıqlama verib.
Bakuplus.az xəbər verir ki, sosial şəbəkə hesabında paylaşım edən aktyor od püskürüb.
“Hörmətli vəkillərimizin bədii materiala həssaslıqla, emosional şəkildə yanaşması və həmin materialı həqarət kimi qəbul etməsi çox üzücüdür. Bu, Beynəlxalq Coğrafiya Cəmiyyətinin “düzplanetçilərə” qarşı fikir bildirməsinə və ya onlarla polemikaya girməsinə bənzəyir... Hörmətli vəkillərimizin “Əqrəb Mövsümü: İki dünya bir olsa da” serialında hansısa sifariş xarakterli bir əməl, yaxud fikir axtarması, onların nəyəsə və kiməsə “alət edilməsi” düşüncələrini irəli sürməsi hörmətli vəkillərimizin “konspirologiya”ya inanmasına dəlalət edir... Müstəqillik tariximizdə “o*raş vəkil”, “qansız həkim”, “rüşvətxor hakim”, “avara polis” olduğu kimi, “şərəfsiz rejissor” və “namussuz ssenaristlər” də var. Azərbaycan kinosu uzun illər senzuradan, ifadə və bədii azadlığın məhdudlaşdırılmasından əziyyət çəkib. Biz cəmiyyəti maraqlandıran mövzulara, plüralizm və ifadə azadlığını kinomuza, televiziyamıza təzə-təzə gətirmək istəyirik ki, bu da müxtəlif qurumlar tərəfindən birmənalı qarşılanır... Bir Azərbaycan vətəndaşı olaraq mənim gələcəyə olan ümidlərimi sarsıdırsınız... İnsan faktoru hər zaman sovet propaqandasının təşviq etdiyi “Dyadya Styopa” ola bilməz...”, - deyə o, paylaşımında qeyd edib.
