Ölkəmizi İsveçrənin Basel şəhərində keçiriləcək 69-cu “Eurovision 2025” Mahnı Müsabiqəsində təmsil edəcək iştirakçının adı 4 fevralda rəsmi olaraq elan ediləcək.
Bakuplus.az xəbər verir ki, ilk dəfə olaraq tam şəffaf və anonim şəkildə keçirilən səsvermə prosesindən görüntülər ictimaiyyətə təqdim olunub.
Münsiflər heyəti Azərbaycan musiqi sənayesinin tanınmış simalarından və xarici musiqi mütəxəssislərindən ibarət olub. Səkkiz peşəkar musiqiçi və nümayəndə heyəti sırasına məşhur repçi Elşad Xose, “Avroviziya 2017” təmsilçimiz Diana Hacıyeva, “Avroviziya 2009” təmsilçimiz Aysel Teymurzadə, DJ və prodüser Heydər, bəstəkar və xalq artisti Faiq Sücəddinov, musiqiçi və əməkdar artist Rain Sultanov, aparıcı və İctimai Radionun direktoru DJ Fateh, həmçinin İctimai Televiziya və Radio Yayımları Şirkətinin Baş Direktoru Balakişi Qasımov daxildir.
Müsabiqənin seçim mərhələsində 154 mahnı arasından seçilmiş 12 namizəd iştirak edib. Yerli və xarici musiqi nümayəndələrinin səsverməsi nəticəsində bu namizədlər arasından Azərbaycanın “Avroviziya 2025” təmsilçisi müəyyən edilib.
