Bu gün Azərbaycan tarzəni, SSR əməkdar artisti Muradov Məmmədağa Məmmədhəsən oğlunun doğum günüdür.
M.Muradov 1921-ci ildə Bakı şəhərində anadan olub. Qədim klassik janr olan muğamın görkəmli ustadları Mansur Mansurov, Qurban Pirimov, Bəhram Mansurov bu şəhərdə gənc tarzənin yaradıcılığının inkişafına, onun mahir tarzən kimi yetişməsinə müsbət təsir göstəriblər.
M.Muradov gənc yaşlarından ifaçılığa başlamış və o, 1937-ci ildə M.Maqomayev adına Azərbaycan Dövlət Filarmoniyasının xalq çalğı alətləri orkestrinə qəbul olunub. O, tez bir zamanda orkestrin solisti olub, daha sonra isə konsertmeyster vəzifəsində çalışıb.
M.Muradov eyni zamanda Bakının bir sıra musiqi məktəblərində, o cümlədən A.Zeynallı adına musiqi məktəbində uzun müddət müəllim işləmiş, istedadlı gənc tar ifaçılarının yetişməsində böyük rolu olub.
Qurban Primovun yetirməsi olmuş, onun ifaçılıq ənənələrini davam etdirib. O, ADF-nın solisti kimi çalışıb. Görkəmli tarzən Xan Şuşinskini, Zülfi Adıgözəlovu müşayiət etmiş və həmin ifalar qrammofon vallarında həkk olunub. M.Muradov Azərbaycan muğamlarının mahir solo ifaçısı kimi də tanınıb.
Azərbaycanda tar ifaçılığı sənətinin inkişafı və təbliğində görkəmli tarzən, respublikanın əməkdar artisti Məmmədağa Muradovun xüsusi yeri var. O, yaradıcılığının çiçəkləndiyi bir dövrdə — ömrünün 48-ci ilində həyatdan köçüb. Lakin bu qısa ömrü ərzində incəsənətimizin, tar sənətinin bütün dünyada tanınmasında əlindən gələni əsirgəməyib. Onun özünəməxsus ifa tərzi, şirin barmaqları, yüksək çalğı texnikası bu gün də gənc sənətçilərə bir örnək olaraq qalır.
