“İki əsas maneənin – ATƏT-in Minsk Qrupunun ləğvi və Ermənistan Konstitusiyasına dəyişikliklərin aradan qaldırılması sülh sazişinin imzalanması üçün real imkan açır”.
Bakuplus.az xəbər verir ki, bu sözləri Azərbaycanın xarici işlər naziri Ceyhun Bayramov Antalyada Diplomatik Forum çərçivəsində keçirilən panel müzakirəsində deyib.
“Biz inanırıq ki, bu zəruri addımlardan sonra iki ölkə arasında sülh və dövlətlərarası münasibətlərin qurulması haqqında sazişin yekunlaşdırılması və imzalanması üçün əlavə maneələr olmayacaq”, - nazir vurğulayıb.
Ermənistanın xarici işlər naziri Ararat Mirzoyan da öz növbəsində bəyan edib ki, Ermənistanla Azərbaycan arasında de-fakto münaqişə yoxdur, lakin de-yure hələ də imzalanmış sülh müqaviləsi yoxdur.
"Biz Azərbaycanla normallaşma prosesini müzakirə etdik və uzun müzakirələrdən sonra sülh sazişinin mətnini razılaşdırdıq. Hazırda məqsədimiz sülh sazişinin imzalanma yerini və gününü müəyyən etməkdir. Hesab edirik ki, bu, münasibətlərin qurulmasının başlanğıcıdır", - Mirzoyan bildirib.
Mirzoyan vurğulayıb ki, həll yolu sənədi imzalamaq və münaqişəyə son qoymaqdır.
