Pərviz İsmayıl bəy oğlu Rüstəmbəyov 1922-ci il yanvarın 7-də Bakıda anadan olub.
Bakuplus.az xəbər verir ki, Pərviz Rüstəmbəyov 15 yaşından etibarən saksofon alətində ifa etməyə başlayır. Atası isə bu seçimdən narazı olur. Çünki o, oğlunun toylarda ifa edə biləcəyi bir musiqi aləti seçməsini istəyirdi.
1940-cı ildə 18 yaşında ikən Tofiq Quliyev onu “Sənətkarlıq” kinoteatrında çıxış edən orkestrinə dəvət edir.
1944-cü ildə Bakıda qastrolda olan məşhur cazmen Eddi Rozner Pərviz Rüstəmbəyovun istedadını görür və onu öz orkestrına dəvət edir. Pərviz bu dəvəti qəbul edir və Roznerin orkestrində ifa etməyə başlayır. Orkestrlə birlikdə konsertlərdə ifa edən Pərviz, bir müddət Moskvada yaşayır.
Moskvada dostları ilə birgə “Metropol” restoranında şam edərkən, orada çıxış edən caz orkestrinin üzvləri Pərvizi tanıyaraq onu ifa üçün səhnəyə dəvət edirlər. Amerika klassiklərinin musiqilərini ifa etməsi restorandakı amerikalıların marağına səbəb olur. İfadan sonra onlar Pərvizlə tanış olub, onu ABŞ-a dəvət edib və cazın vətənində təcrübə qazanmağı təklif edirlər.
Amerikalıların dəvəti ilə ifaçı ABŞ səfirliyinə gedir. Səfirlikdə mədəniyyət attaşesi ilə görüşmək istəsə də, onu yerində tapmayaraq geri qayıdır. Səfirlikdən çıxdıqdan sonra sivil geyimli iki DTK üzvü ona yaxınlaşıb, Amerika səfirliyində nə etdiyini soruşurlar. Pərviz isə səfirliyə nə üçün getdiyini onlara açıqlayır. Sonradan Pərvizdən Moskvanı tərk etməsi istənilir. Növbəti günlərdə də izlənildiyini hiss edən Pərviz məsləhət üçün o vaxt Moskvada olan Tofiq Quliyevin yanına gedir. Tofiq Quliyev isə ona pul verərək təcili bilet alıb Bakıya qayıtmağını tapşırır.
Bakıya qayıtdıqdan sonra öz orkestrini yaratmaq qərarına gəlir. Əvvəlcə “Qırmızı Şərq”, sonra isə “Sənətkar” kinoteatrında öz orkestri ilə birlikdə çıxış etməyə başlayır. Lakin 1949-cu ilin yanvar ayında "Qərbə pərəstişkarlıq" etməkdə təqsirləndirilərək işdən azad olunur.
İşdən qovulduqdan sonra bir müddət iş tapa bilmir. Daha sonra vağzal yaxınlığında kiçik bir restoranda işə düzəlir. Dörd aydan sonra, 1949-cu il mayın 20-də Pərviz Rüstəmbəyov “antisovet və amerikapərəst əhval-ruhiyyəli şəxs” ittihamı ilə həbs olunur.
O, 1949-cu ilin dekabrın 29-da həbsxanada müəmmalı şəkildə dünyasını dəyişir.
Qeyd edək ki, Pərviz Rüstəmbəyov caz musiqisi ilə muğamı sintez edən ilk cazmen olub.
