Bu gün Azərbaycan və Rusiyanın Xalq rəssamı, Avropa Elm və İncəsənət Akademiyasının həqiqi üzvü, Dövlət mükafatı laureatı Tahir Salahovun anadan olmasından 96 il ötür.
Bakuplus.az xəbər verir ki, 1928-ci ildə Bakıda dünyaya göz açan sənətkar yaradıcılığı və ictimai fəaliyyəti ilə xalqına, incəsənətimizə dəyərli töhfələr verib.
Tahir Salahov Azərbaycan incəsənətinin ən böyük ustalarından biri və rəngkarlıqda “sərt üslub”un banisidir.
O, “Sənə, Bəşəriyyət”, “Bəstəkar Q.Qarayevin portreti” “Təmirçilər”, “Neftçinin portreti” və başqa məşhur əsərlərin müəllifidir.
Dünya miqyasında aparıcı portret ustası olan rəssamımızın əl işləri yüksək titullara layiq görülərək yalnız Azərbaycanda deyil, onun hüdudlarından kənarda da muzeylər və qalereyalarda nümayiş etdirilir.
