Xalq artisti Flora Kərimova plastik-cərrah Sevinc Heydərovanın lisenziyasının ləğv edilməsi ilə bağlı açıqlama yayıb.
Bakuplus.az xəbər verir ki, müğənninin açıqlamasını hazırda Amerikada yaşayan jurnalist Qənirə Ataşova paylaşıb.
Xalq artisti bildirib ki, S.Heydərovanın həkimlik lisenziyasının əlindən alınması üçün hüquqi mübarizəsi uzun müddətdir davam edir:
"Bu haqq, düz sözün qələbəsidir. Bu qələbə çox insanın səhhətinin zəmanətidir. Neçə illərdir savadsız həkimlərlə savaşım bu gün nəticələndi. Onlar başa düşmədilər ki, hər dəfə milləti, xəstələri aldadanda özləri uçuruma gedirlər. Neçə dəfə mən Sevinc xanıma demişdim ki, bacarmırsansa, bacarmadığın işdən yapışma. Nəticəsi saxta sənədlər, sübutlar, adlar və fəaliyyət...
Ümumiyyətlə, iş çox mürəkkəb idi. Nə qədər saxtalıq olar? Sizin hər addımınız saxta idi. Düşünəndə ki, nə qədər belə həkimlər var, məni dəhşət bürüyür. Və hər bir xəstə həkimdən asılıdır. Hər mübarizə bugünkü nəticə ilə qurtarmır. Bu işi qələbə ilə nəticələndirən vəkillərimə təşəkkür edirəm. Bu məsələləri ictimailəşdirən Qənirə qızım. Çox sağ olun! Sizin zəhmətiniz böyükdür. Mənim haqq səsimi eşidib, inanıb, ürəyiniz yandı və ictimaiyyətə çatdırdınız".
Sənətçi deyib ki, S.Heydərovaya dəstək olanlar bilsin ki, bu problemdən əl çəkməyəcəm.
"İşim bu saat Ali Məhkəmədədir. Sona kimi də gedəcəyəm. Nəticə əldə edənə qədər savaşıram. Dörd dəfə haqsız rəylərlə ekspertizanın nəticəsini oxuyub, eşidəndə əlimi hər şeydən üzmüşdüm. Burada açıq dəstək var idi. Və o dəstək çox insanların, xəstələrin evini yıxacaqdı, çünki Sevinc xanıma qol-qanad verirdi”, - deyə Xalq artisti qeyd edib.
