“Devin Medya Akademi”nin fırıldaqçılıq etməsi ilə bağlı iddialar yayılıb.
Məsələ ilə əlaqədar Bakuplus.az-a “Devin Medya Akademi”nin direktoru Atila Uysal açıqlama verib.
Onun sözlərinə görə, dünəndən bəri bu məsələ ilə bağlı bir neçə nəfərlə görüşüb:
“Biz bu şirkəti insanları aldatmaq üçün açmamışıq. İllərdi bu sahədə fəaliyyət göstəririk. Aldığımız ödəmə isə fotoların çəkilməsi üçündür. Məcburiyyət yoxdur, hər kəsin öz razılığı ilə edilir. Həm də akademiyamıza qəbul olan insanların reklam, kino, serial çəkilişlərində aktyor kimi obraz canlandırmasını təmin edirik.
Həmidə Ömərova məsələsinə gəldikdə isə onunla biz yay aylarında danışıq apardıq. Çəkilişlərinin çox olduğu üçün əməkdaşlıq edə bilmədik. Bunu özü də deyib. Bununla yanaşı, akademiyamızda dərs deyən şəxslər kino sahəsində tanınmış adamlardır. İlk görüşlərimizdə Həmidə Ömərovanın iştirakını demişdik. Amma Həmidə Ömərovanın dərs deməsi barədə insanlara məlumat verməmişik.
Məsələn, Nurəddin Mehdixanlı ilə də danışmışıq. Onunla sabah görüşəcəyik. Bizim fırıldaqçılıqla bağlı fikrimiz yoxdur”.
***
11:11
“Devin Medya Akademi”nin fırıldaqçılıq etməsi ilə bağlı iddialar yayılıb.
Bakuplus.az xəbər verir ki, bu barədə məlumat sosial şəbəkələrdə paylaşılıb.
Belə ki, “Devin Medya Akademi” film çəkilişləri üçün həvəskar şəxslər axtarıldığına dair elan paylaşıb. Bu elanı görüb müraciət edən şəxslərdən “WhatsApp” qrupuna əlavə olunmaları üçün 20 manat tələb olunub. Sonrakı prosesdə isə 3 aylıq kurs üçün 600 manat ödənilməsi tələbi irəli sürülüb.
Şikayətçi olan şəxslər qrupda 871 nəfərin olduğunu qeyd edirlər. 871 nəfərin hər birindən qrupa əlavə edilməsi üçün 20 manat pul alınıb.
Qeyd edək ki, “Devin Medya Akademi”nin yaydığı elanda Həmidə Ömərova, Pərviz Malik kimi ustadların dərs verəcəyi bildirilib.
Bakuplus.az məsələ ilə bağlı “Devin Medya Akademi” ilə əlaqə saxlamağa çalışıb. Lakin dəfələrlə cəhd etməyimizə baxmayaraq zəngimizi cavablandıran olmadı.
Elanda adı çəkilən Xalq artisti Həmidə Ömərova isə Bakuplus.az-a açıqlamasında qeyd edib ki, məsələ ilə bağlı onunla yayda əlaqə saxlayıblar:
“Yayda bir oğlan mənimlə əlaqə saxladı. Dedi ki, belə bir kurs açılır və məni orda dərs deməyə dəvət etdilər. Mən də bildirdim ki, çəkilişlərim olduğu üçün vaxtım yoxdur. Təkliflərini qəbul etmədim. O zamandan bəri isə onlarla əlaqə saxlamamışam. Elə dünən də mənə 1-2 nəfər zəng edib soruşdu, mən də dərs demədiyimi bildirdim. Əvvəlcədən kimlərdənsə pul alınması barədə məlumatım yoxdur”.
Fidan İlqar
