Bakının mərkəzində yerləşən köhnə “Sovetski” məhəllələrinin birindəki qədim hamamda bərpa işləri başlayıb.
Bakuplus.az xəbər verir ki, bu barədə sosial şəbəkələrdə məlumat yayılıb.
Məlumata görə, hamam qədim olsa da, onun haqqında bir çox adamın xəbəri yoxdur.
Hətta bu küçədə uzun müddət yaşayan elə sakinlər var ki, onlar da yalnız bu günlərdə hamamın binasına daxil ola biliblər. Bu imkanı isə onlara, deyilənə görə, ötən cümə günü hamamın bərpası münasibətilə keçirilən tədbir yaradıb.
Bərpa işlərinin sifarişçisi və ya icraçısının kim olduğu bilinmir. Hələlik bununla bağlı rəsmi açıqlama yoxdur.
Ancaq memarlıq abidələrinin siyahısında bu hamamın 1899-cu ildə tikildiyi (inventar nömrəsi: 3578) və yerli əhəmiyyətli memarlıq abidəsi olduğu məlumdur.
Qeyd edək ki, siyahıda həmin abidənin ünvanı “Zərgərpalan küçəsi 87” qeyd edilib. Ancaq hazırda bu yer Həmidağa Hüseynzadə (Vətən müharibəsi şəhidi) küçəsi adlanır.
