“Netflix”in ən populyar seriallarından birində mənə rol təklif edildiyini eşitmək çox xoş oldu. Özümü inanılmaz dərəcədə şanslı hiss etdim”.
Bunu 1news.az-a müsahibəsində ABŞ-də yaşayan və işləyən azərbaycanlı aktyor, “Netflix”in ən çox baxılan layihələrindən biri olan “Gecə Agenti” serialında rol alan Tural Manafov deyib.
O, Hollivud arzusu ilə ABŞ-yə getməsindən, aktyorluğa və kinoya olan dərin sevgisindən bəhs edib:
“Bakı Dövlət Universitetini bitirdikdən sonra ABŞ-dəki məktəblərə müraciət etməyə başladım və sonda Nyu-York Film Akademiyasına qəbul oldum. Nyu-York həmişə xəyallarımın şəhəri olub. Burada olmaq nağıl kimi idi. Bu, arzumu həyata keçirmək üçün ilk real addım idi”.
Tural Manafov Cim Kerrinin pərəstişkarı olduğunu və onunla Nyu-Yorkdakı görüşündən söz açıb:
“Nyu-Yorkda keçirdiyim ilk il ərzində heyrətamiz bir hadisə baş verdi. Cim Kerri ilə tanış oldum. Məni aktyor olmağa necə ruhlandırdığını söylədikdə qarşımda dayandığına, əlini sıxmağıma inana bilmirdim. Çox danışmadı, amma mənə baxdı və “Sənə uğurlar arzulayıram” dedi”.
“Netflix”in “Gecə Agenti” layihəsinə necə təklif almasından danışan T.Manafov qeyd edib ki, bu, onun üçün çox gözlənilməz olub:
“Son rolumdan bəri 55-dən çox dinləmədə olmuşdum, amma hər biri uğursuz olmuşdu. Əməkdaşlıq etdiyim agentlik Laszlo rolu ilə bağlı təklif gəldiyini mənə deyəndə öncə inanmadım. Filmdə Laszlo Birləşmiş Millətlər Təşkilatına kütləvi hücum planlaşdıran pis adamlardan biridir – mənim personajım Manhettendə ən dəhşətli hücumlardan birinin həyata keçirilməsində əsas rol oynayır”.
Tural Manafov “Gecə agenti” serialında Laszlo rolunda
O bildirib ki, filmdə ən çox diqqət çəkən səhnələr baş rol ifaçısı Gabriel Basso ilə birlikdə çəkildiyi anlar olub:
“Bir səhnə var ki, o, məni təqib edir – biz bunu düzgün etmək üçün çox çalışdıq. Bu, onun, rejissor və mənim aramızda olan əsl komanda işi idi. Bir gülməli anı xatırlayıram ki, Qabriel məni qandallamaq məcburiyyətində qaldı və o, bunu edə bilmədi. Qabriel qışqıraraq “Bu dostumuzun qeyri-adi böyük əlləri var!” dedi. Onun bu reaksiyası bütün gərginliyi aradan qaldırdı və hamımız gülməyə başladıq”.
Tural Manafov ABŞ-də miqrant həyatının çətinliyindən də danışıb:
“Düşünürəm ki, ən böyük fərq odur ki, bir miqrant olaraq sıfırdan başlayırsınız, heç bir reputasiyanız yoxdur və daimi olaraq buradakı həyata adaptasiya olmağa çalışırsınız. Burada doğulub böyüyən biri deyilsinizsə, həmişə daha çox çalışmalısınız. Siz tez-tez stereotiplərlə mübarizə aparmalı və daha çox şeyə qadir olduğunuzu sübut etməlisiniz. Ancaq digər tərəfdən, əgər onlar üçün işləməyə hazırsınızsa, ABŞ imkanlarla doludur. Bəzi mənalarda miqrant olmaq hətta üstünlükdür. Siz çoxları üçün maraqlı olan unikal, təzə perspektiv gətirirsiniz. Əgər hər hansı digər aktyor kimi israrlı və qətiyyətlisinizsə, bunu bacara bilərsiniz”.
