İnsult keçirən Xalq artisti Ənvər Həsənovun vəziyyəti yenidən ağırlaşıb.
Bakuplus.az xəbər verir ki, bu barədə aktyorun qızı Aytən Həsənova məlumat verib.
Bildirib ki, atamın vəziyyəti yaxşı deyil:
“İnsultdan sonra danışıq qabiliyyətini itirib, yaddaşı yerində deyil. Hərəkət edə bilmir. Yanında qaldığım üçün yalnız məni tanıyır.. Ümidimizi itirmirik”.
Xalq artisti Ənvər Həsənovun vəziyyəti ilə bağlı Tibbi Ərazi Bölmələrini İdarəetmə Birliyi (TƏBİB) Bakuplus.az-a açıqlama verib.
Bildirilib ki, Xalq artisti Ənvər Həsənov 31.01.2025-ci il tarixində saat 15:00 radələrində Tibbi Reabilitasiya Mərkəzinə yerləşdirilib.
“Hazırda Terapiya şöbəsində medikamentoz və fizioterapevtik müalicəsi davam edir. Vəziyyəti orta ağır qiymətləndirilir”.
Qeyd edək ki, Ənvər Həsənov Azərbaycan kino sənətinin inkişafındakı xidmətlərinə görə 18 dekabr 2000-ci ildə Azərbaycanın Əməkdar artisti, 1 avqust 2018-ci ildə isə Xalq artisti fəxri adlarına layiq görülüb. 6 may 2023-cü ildə Azərbaycan mədəniyyətinin inkişafında xidmətlərinə görə Azərbaycan Respublikası Prezidentinin fərdi təqaüdünə layiq görülüb.
Ə.Həsənov “Yeddi oğul istərəm” filmində Cəlal, “Dərviş Parisi partladır” filmində Şahbaz, “Babək” filmində Tərxan, “Atları yəhərləyin” filmində Sirac, “Uşaqlığın son gecəsi” filmində Murad və başqa yaddaqalan obrazlar yaradıb.
Nəzrin Vahid
