“CAS GROUP” MMC şirkəti xarici müğənnilərin Azərbaycanda konsertini təşkil etmək adı ilə bizim və bir çox fiziki şəxslərin pulunu mənimsəyib”.
Bu şikayətlə qafqazinfo.az-a “AVIA RISE” MMC turizm şirkəti tərəfindən müraciət daxil olub.
Şirkət nümayəndəsinin iddiasına görə, “CAS GROUP” MMC populyar xarici müğənnilərin Bakıda və digər ölkələrdə konsertini təşkil etmək adı altında onlara 21 min 888 manat məbləğində ziyan vurub: “CAS GROUP” MMC-nin nümayəndəsi kimi bizimlə bütün danışıqları Fatimə İmanzadə adlı şəxs aparıb. O, şirkətin təsisçisi və direktoru Amil Hacıyevin adından ölkəmizdə konsertini təşkil edəcəkləri əcnəbi müğənnilərin aviabilet xərclərinin alınması və qonaqlama xidmətinin göstərilməsi üçün bizim turizm şirkəti ilə müqavilə bağlayıb. Onlar bizə 57 min manatın 35 min manatını ödəsə də, 2024-cü ilin iyun ayından məbləğin 21 min 888 manatını ödəməkdən boyun qaçırırlar.
“AVIA RISE” MMC-nin müraciətində bildirilib ki, sözügedən şirkət tərəfindən bir çox digər fiziki şəxsin də pulu mənimsənilib: “Onlar populyar rus və türk müğənnilərin ölkəmizdə konsertinin təşkilatçılığı adı altında daha iki fiziki şəxsi də aldadaraq onlarla bağladıqları investor müqaviləsini kobud şəkildə pozublar. “CAS GROUP” MMC ümumi olaraq hüquqi və fiziki şəxsləri aldadaraq onlara 210 min manat zərər vurub. Fatimə İmanzadə müqavilə bağladığı şəxsləri aldadaraq konsertin təşkilindən əldə edəcəyi puldan onların borcunu ödəyəcəyinə və əlavə qazanc əldə edəcəklərinə inandırıb.
Amma sonra onun yalan vəd verdiyi, adlarını çəkdiyi bəzi müğənnilərin, ümumiyyətlə, ölkəmizdə konsertini təşkil etmədiyi məlum olub. Belə ki, 2024-cü ilin iyunun 7-də Türkiyənin tanınmış sənətçisi Sefonun konserti “Elektra Hall” konsert zalında (indiki adi ile Jolly&Joker) baş tutsa da, borc verənlərə heç bir vəsait ödənilməyib. Eyni plan üzrə ötən ilin iyulun 14-də “Elektra Hall”da rus sənətçisi GUF-un konsertini təşkil etsələr də, konsert adı altında borc alınan şəxslərin pulu geri verilməyib”.
Şikayətdə bir çox konsertlərin təşkilində də eyni halların yaşandığı bildirilir: “Ötən il oktyabrın 29-da türk sənətçisi MURDA-nın Özbəkistanın paytaxtında yerləşən “Sport Kompleks Unusadab”da konsertini keçirəcəklərinə dair müqavilə bağlayıb, investordan bu məqsədlə pul alsalar da, konserti təşkil etməyiblər. Müğənni ilə əlaqə saxladıqda bildirildi ki, təşkilatçı Fatimə və Amil tərəfindən onlara konsert üçün heç bir məbləğ ödənilməyib. Bir ilə yaxındır ki, Fatimə İmanzadə konsert təşkilatçılığı üçün pul aldıqları hüquqi və fiziki şəxslərə müxtəlif bəhanələr gətirərək məsuliyyəti öz üzərindən atır, maliyyə məsələlərinə Amil Hacıyevin məsul olduğunu söyləyir”.
Qeyd edilib ki, şirkətlərin ikitərəfli müqavilələri olduğu üçün onların bu əməli dələduzluq kimi qiymətləndirilməyib: “Bundan sonra biz məhkəməyə müraciət etməli olduq. Fatimə İmanzadə və Amil Hacıyev barədə məhkəməyə şikayət etsək də, indi də onlar başqa şəxslərin adına şirkət təsis edərək konsert təşil etməkdə davam edirlər.
Hətta Fatimə İmanzadə mayın 11-də CAKAL&EBO adlı, iyunun 8-də isə BLOK 3 adlı türk sənətçilərinin Bakıda konsertlərinin təşkili ilə bağlı öz sosial şəbəkə hesablarında paylaşımlar edir. Onların bu qanunazidd əməllərinin qarşısı alınmasa, qurbanların sayı daha da artacaq”.
İddialarda adı keçən tərəf Fatimə İmanzadə ilə əlaqə saxlanılıb. Şirkətin əməkdaşı olduğu deyilən qadın bildirib ki, o, “CAS Group” MMC-nin nə təsisçisi, nə direktoru, nə də əməkdaşıdır: “Mənim hər hansı şəxslə borc və ya investisiya müqaviləm olmayıb. Şikayət edən şəxslər kimi mən də ittiham olunan adamla sadəcə müəyyən müddət iş görmüşəm, lakin bu məsələlərlə heç bir bağlantım yoxdur. Hətta heç bir rəsmi hüququ prosedurlarda da yer almamışam. İttiham olunan tərəf sadəcə “CAS Group” MMC-dir. Onun təsisçisi isə Amil Hacıyevdir”.
Amil Hacıyevin mövqeyini öyrənmək cəhdləri isə nəticəsiz qalıb. Çünki “CAS GROUP” MMC şirkətinin adına heç bir sosial platforma və ya rəsmi sayt mövcud deyil. A.Hacıyevə məxsus olduğu deyilən sosial şəbəkə hesabına göndərdiyimiz suallarımız isə cavablandırılmadı.
GUF
SEFO
MURDA
CAKAL&EBO
BLOK 3
