Bakının məşhur istirahət məkanlarından biri olan Mərkəzi Nəbatat Bağı ilə bağlı daha bir iddia yayılıb.
Bakuplus.az-ın məlumatına görə, tanınmış "make up" ustası Məhbubə Məmmədli şəxsi sosial şəbəkə hesabında qızı və başqa bir neçə uşağın bağda zəhərləndiyini bildirib.
Onun sözlərinə görə, uşaqlar bağın piknik ərazisində olarkən dərman maddələrinin təsirinə məruz qalıb, ərazinin dərmanlı olması barədə isə əvvəlcədən heç bir xəbərdarlıq edilməyib:
"Oradakı piknik bölgəsində dərmanlama işləri getdiyi halda heç bir məlumat yazısı yox idi. Vəziyyət o qədər ağırdır ki, dərmanlar təsir etmir, uşaqlar sağala bilmir. Bu, biabırçılıqdır. Uşaqlar ölə bilərdi!" – M.Məmmədli deyib.
Mərkəzi Nəbatat Bağının rəsmi səhifəsində isə bildirilib ki, ümumi dezinfeksiya işləri aparıldığı üçün piknik sahəsi müvəqqəti olaraq bağlanıb. Zərərçəkmiş uşaqların valideynlərinin sözlərinə görə isə bu məlumat çox gec və hadisədən sonra paylaşılıb.
"Heç olmasa hansı dərman olduğunu paylaşın ki, uşaqları düzgün müalicə edə bilək. Həkimlər hələ də anlaya bilmir nə olduğunu. Qanda allergiya miqdarı çox yüksək çıxıb. 10 gündür ağır dərmanlarla belə sağalma çox çətin gedir", - deyə vizajist əlavə edib
Məsələni aydınlaşdırmaq üçün Bakı Şəhər İcra Hakimiyyətinə sorğu ünvanladıq.
Qurumdan sorğumuza cavab olaraq bildirildi ki, bağ ərazisində cari işlər çərçivəsində ağaclarda yayıla biləcək müxtəlif xəstəliklər, inseksid və funqisidlərə qarşı mütamadi olaraq dezinfeksiya işləri aparılmaqdadır:
"Ancaq onu da qeyd edək ki, istifadə olunan dezinfeksiya məhlullarının insan sağlamlığına heç bir zərəri yoxdur".
Qeyd edək ki, ötən həftə Nəbatət Bağı azyaşlını ilan sancması xəbəri ilə gündəmə gəlmişdi.
