Xəbər verildiyi kimi, Azərbaycanda bəzi məşhur simaların “1Xbet”, “Mostbet”, “Pin-up”, “10lineloto” kimi qanunsuz mərc və şans oyunları platformalarını reklam etməsiylə bağlı xəbərlər yayılıb.
Müğənnilərin, aktyorların və influserlərin olduğu siyahıda məşhur aktyor Azər Aydəmirin və müğənni Damlanın da adı var.
Azər Aydəmir məsələ ilə bağlı Bizim.Media-ya açıqlamasında heç vaxt bu cür reklam etmədiyini və etmək fikri olmadığını qeyd edib:
“Mən elə bir şey etməmişəm, adım orada səhvən hallanıb. Orada bir-iki həmkarımın və Xatirə Yüzbəyovanın da adı var. Mən inanmıram ki, o da belə bir şey etsin. Mənə elə gəlir ki, bu ümumi məlumat səhvidir. Vaxt keçəcək, biləcəyik. Yəqin adları qarışdırdıqları üçün üzr istəyərlər”, - deyə aktyor açıqlayıb.
Qanunsuz mərc oyunlarının reklamıyla bağlı adı çəkilənlərdən biri də müğənni Damladır.
Müğənninin prodüseri Şamil İbrahimov iddialara cavab olaraq deyib ki, bu hadisə 4 il əvvəl, pandemiya vaxtı olub, müğənni buna görə cərimə də ödəyib.
“O vaxt bununla bağlı xəbərdarlıq edildi və Nərimanov rayon məhkəməsində iş qaldırıldı. Cəriməni ödədik və məsələ bitdi”.
Qeyd edək ki, Daxili İşlər Nazirliyinin açıqlamasına görə internet resursları, eləcə də informasiya telekommunikasiya şəbəkələrindən istifadə etməklə qanunsuz olaraq qumar və mərc oyunları təşkil edən şəxslərlə bağlı polisə daxil olan hər bir müraciət araşdırılır.
