Qış turizmi artıq başlayıb. Bir çox ölkələrdə və bölgələrimizdə qış turizmi ilə bağlı müxtəlif tədbirlər, fəaliyyətlər həyata keçirilir. Dağ xizək mərkəzləri açılır, bəziləri isə qarlı yollar, dağlar və təbiət mənzərələri ilə ziyarətçiləri qarşılayır. Qış turizmi xizək, buz üzərində gəzinti, qar safari və digər qış idmanları ilə məşğul olmaq istəyən turistlər üçün cəlbedici olur.
Azərbaycanın da dağlıq ərazilərində qış turizmi inkişaf edir. Quba, Qusar, Şahdağ, Tufandağ və digər dağ kurortları qış mövsümündə xizək və digər fəaliyyətlərlə turistləri cəlb edir.
Bəs görəsən, əvvəlki illərə nisbətən vəziyyət necədir?
Mövzu ilə bağlı BakuPlus.az-a açıqlama verən turizm məsələləri üzrə ekspert Ceyhun Aşurovun sözlərinə görə, qış turizmi dekabrın ortasından açıq elan edilib:
“Coğrafi olaraq qış fəsli başlamış hesab olunur. Bununla əlaqədar hər il olduğu kimi yeni il ərəfəsində tətillər gözlənilir. Və insanlar tətil zamanı səyahətlərini planlayırlar. Bir qismi ölkə daxilinə, bir qismi isə xaricə üz tutur.
Ölkə daxilində də tələbatın yüksək olacağı gözlənilir. Bununla bağlı regiondakı otellər öz təkliflərini artıq veriblər. Biz qiymətlərin iki nəfər üçün iki gecə, üç gün qalmaqla, üç dəfə qidalanmaqla yeni il şənliyi daxil təxminən 1000-2500 manat arasında dəyişdiyini görürük. Bəzi regionlarda qiymətlər daha aşağıdır”.
C.Aşurov qeyd edib ki, Qusar və Qəbələ turistlərin daha çox üz tutduqları yerlərdir:
“Şamaxı, Lənkəran, Astarada turistlərin aktivliyi gözlənilir. Gəncə istiqamətini də əlavə etmək istərdim. Sürət qatarının olması turist sıxlığının nisbətən az olmasını, qiymətləri əlverişli edir. Bu qədim Nizami yurdunda turistlərin tələbatına cavab verəcək otellər, qalma yerləri və restoranlar mövcuddur.
Ümumi qiymətlər keçən ilkindən yuxarı deyil. Bunun da əsas səbəbi bu bazara hər il yeni təklif və yeni otellərin daxil olmasıdır ki, bu da qiymətlərin ciddi şəkildə qalxmasına imkan vermir. Ümumi götürdükdə bəzi qiymətləri bizim vətəndaşlar da haqlı olaraq yüksək hesab edir. Qiymətlərin qalxma səbəbi əsasən tələbatın yüksək olmasıdır. Bazarda bu qiymətlərin müştəriləri vardır”.
Nəzrin Vahid
