Abşeron rayonu, Saray qəsəbəsinə əsas giriş olan Məhəmməd Əsədov küçəsi bərbad vəziyyətdədir.
Bu barədə Bakuplus.az-a qəsəbə sakinləri məlumat verib.
Onların sözlərinə görə, küçədə piyadalar üçün səki yoxdur və yollar baxımsız vəziyyətdədir:
“2 nömrəli tam orta məktəbin yolları zülmət qaranlıqdır. İşıq dirəkləri var, amma işıq yoxdur. Məktəbə gedən yollar palçıqdır. Uşaqların gediş-gəlişinə çətinlik yaradır. Küçə yaman gündədir”.
Şikayətçilərin sözlərinə görə, yollarla bağlı Azərbaycan Avtomobil Yolları Dövlət Agentliyinə (AAYDA) müraciət ediblər. Ancaq qurum həmin ərazinin onların balansında olmadığını bildirib.
“Deməli, bu yolları ya Abşeron Rayon İcra Hakimiyyəti, ya da Saray bələdiyyəsi düzəltməlidir”, - deyə sakin bildirib.
Həmçinin sakinlər məktəbin həyətindəki sahibsiz itlərə görə də narahatdırlar.
