Bu gün Azərbaycan bəstəkarı və müğənnisi, SSR Xalq artisti Polad Bülbüloğlunun doğum günüdür.
Bakuplus.az xəbər verir ki, sənətkar 4 fevral 1945-ci ildə Bakı şəhərində dünya şöhrətli müğənni, SSRİ Xalq artisti, professor Bülbülün ailəsində anadan olub. O, elə soyad kimi atasının ləqəbini - Bülbül götürüb.
Xalq artisti 1968-ci ildə Azərbaycan Dövlət Konservatoriyasını bitirib. Polad Bülbüloğlu geniş yayılmış bir sıra mahnıların müəllifi və ifaçısı kimi tanınıb. Kino filmlərin, dram tamaşalarının musiqilərinin, simfoniya, simfonik poema və s. əsərlərin müəllifidir.
O, həmçinin populyar bəstələrin müəllifidir. Onun “Gəl, ey səhər”, “Doğma diyar”, “Durnalar”, “Bayatılar”, “Bakı”, “Məni gözlə”, “Bənövşələr” və digər nəğmələri Azərbaycan estrada mahnı irsinin parlaq nümunələri kimi bu gün də sevilir. Polad Bülbüloğlu 1988-ci ildən 2006-cı ilədək Azərbaycan Respublikasının Mədəniyyət naziri vəzifələrində çalışıb. 2006-cı ildən 2024-cü ilin sentyabrına qədər ölkəmizin Rusiyada fövqəladə və səlahiyyətli səfiri olub.
2025-ci il fevralın 3-də Azərbaycan Respublikasının Prezidenti İlham Əliyev tərəfindən Azərbaycan Respublikasının ictimai-siyasi və mədəni həyatında uzunmüddətli səmərəli fəaliyyətinə görə 1-ci dərəcəli "Vətənə xidmətə görə" ordeni ilə təltif olunub.
