Sakinlər Xırdalan şəhər Onbirillik Musiqi Məktəbinin istilik sistemindən şikayətçidir.
Bakuplus.az-ın məlumatına görə, sözügedən məktəbdə istilik sistemi olsa da, istifadə edilmir:
“Bu məktəb xaricdən saraya bənzəsə də, daxildən xarabadır. Acınacaqlı vəziyyət odur ki, istilik sistemi olduğu halda bu məktəbə istilik verilmir. Ancaq seçki günündən gününə. Qarşıdan 29 yanvar bələdiyyə seçkisi gəlir. Həmin gün istiliyi bərpa edəcəklər. Ardınca yanvarın 30-u istiliyi kəsəcəklər. Bəzi müəllimlərdən əlavə valideynlər də şikayət edirlər”.
Şikayətçinin sözlərinə görə, məktəbdə təhsil alan uşaqlar otaqlarda üşüyür, hətta bir çoxu xəstəliyə tutulub.
“Övladlarımız “üstü bəzək, altı təzək” məktəbdə xəstəlik tapıblar. Hətta bir neçə şagird ağır pnevmoniya keçirir. Yüksək qızdırma, boğaz ağrısı, tərləmə və nəfəs darlığı ilə müşayiət olunan pnevmoniya…
Bu məktəb Abşeron-Xızı Regional Mədəniyyət İdarəsinin tabeliyindədir. Məktəbin direktoru İkram Manafov, niyə susursunuz? O pnevmoniya keçirən körpələrdən biri dünyasını dəyişsə siz də, tabeliyində olduğunuz Regional idarənin rəhbərliyi də, Azərbaycan Respublikası Mədəniyyət Nazirliyi də cəzalandırılacaq”, - deyə şikayətçi bildirib.
Məsələni aydınlaşdırmaq üçün Bakuplus.az əməkdaşı iki gündür ki, Mədəniyyət Nazirliyinə sorğu ünvanlayıb. Ancaq hələ də sorğumuza cavab gəlməyib.
Qeyd edək ki, sözügedən məktəblə bağlı bu, yeganə şikayət deyil.
