“Sənubər İsgəndərli, Firəngiz Mütəllimova, Məleykə Əsədova, Cahangir Zeynalov. Yanına ən çox bunlar gəlirdi. Allahşükür Paşazadə, Zeynəb Xanlarova və Polad Bülbüloğlu da zəng eləyirdi. Firəngiz gələndə əhvalı daha yaxşı olurdu, zarafatlaşırdılar, özünə gəlirdi”.
Bu sözləri Yaşar Nurinin həyat yoldaşı Rəhimə Nuriyeva kulis.az-a müsahibəsi zamanı deyib.
O, bir vaxtlar Firəngiz xanımla Yaşar bəy haqqında yayılan söz-söhbətlərlə bağlı da açıqlama verib. “Qısqanmırdınız?” sualına Rəhimə xanım belə cavab verib:
“Qətiyyən! Mən onun rollarına sənət əsəri kimi baxırdım. Hətta bəzən deyirdim ki, gərək bu yerdə bir az bərk qucaqlayardın. O biri söhbətlər isə həmişə olub. Mən Sovetskidə böyümüşəm. Heç inanmazdım ki, ər arvadına qarşı belə hərəkət eləyə bilər, yoxsa yox... Deyirdim ki, gözümlə görməyənə qədər inanmaram. O da deyirdi ki, o elə şeydir ki, gözlə görmək olmur”.
R.Nuriyeva bildirib ki, mərhum aktyor ona dəfələrlə xəyanət edib:
"Mənə dəfələrlə xəyanət eləyib, hamısını bağışlamışam. Gözümlə görməmişəm, ancaq bilmişəm. Ona heç nə deməmişəm. Bir də ayılıb ki, söhbət bağlanıb. Hər şeyi problem eləmək olmaz. Bir dəfə ona dedim ki, məndən yaxşısını tapa bilirsənsə, get yaşa. Heç səndən boşanmayacam da. Nə istəyirsən elə. Axşam qayıtdı, dedi ki, səndən yaxşısını tapa bilmədim. Kişidir də. Bir yeməyi nə qədər yemək olar? İndiki cavanların dili çox uzundur”.
