Tanınmış idmançı vəkilinə müqavilə üzrə haqqını ödəmədiyi üçün məhkəməyə verilib. Məhkəmə vəkilin xeyrinə qərar çıxarıb.
Teleqraf xəbər verir ki, "Lider" idman klubunun sahibi İlham Sərdarov vəkilinə qarşı müqavilə öhdəliyini yerinə yetirmədiyi üçün məhkəməlik olub.
Məlumata görə, Xətai rayonunda yerləşən "Olympus Park" tikinti şirkəti tərəfindən "Lider" idman klubunun binası qanunsuz sökülüb. "Olympus Park" şirkəti ilə İlham Sərdarov arasında məhkəmə çəkişməsi iki ildən çox davam edib. Yekunda məhkəmə İlham Sərdarovun xeyrinə qərar çıxararaq şirkətin ona 1,6 milyon manat məbləğində təzminat ödəməsinə qərar verib. Lakin təzminat ödəndikdən sonra İlham Sərdarov və vəkili arasında hüquqi mübahisə yaranıb. Səbəb idmançının müqavilə ilə nəzərdə tutulan öhdəliyi yerinə yetirməməsi olub. Müqaviləyə əsasən, İlham Sərdarov işin onun xeyrinə yekunlaşacağı təqdirdə, aldığı təzminatın 2 faizini vəkilinə imiş. "Olympus Park"a qarşı işi udduqdan sonra isə o, bu şərtə əməl etməyib və müqavilə öhdəliyini inkar edib.
Vəkil isə öz növbəsində məhkəməyə müraciət edib.
Bakı Apellyasiya Məhkəməsinin 4 aprel 2025-ci il tarixli qərarı ilə İlham Sərdarovun vəkilinə kompensasiyanın 2 faizi məbləğində ödəniş etməsi müəyyən edilib. Bununla belə, məhkəmə qərarı bu günədək icra olunmayıb.
