11 avqust 20 Yanvar faciəsinin azyaşlı şəhidlərindən biri - Larisa Məmmədovanın doğum günüdür.
Larisa Məmmədova 1977-ci ildə Bakı şəhərində anadan olub. 1990-cı il yanvarın 19-dan 20-nə keçən gecə Larisa atası Fərman Məmmədov ilə birlikdə atasının işlədiyi L.Şmidt adına zavoda gedib. Zavodun yanında avtobusda oturduqları yerdə maşın gülləbaran edilib, Larisa ürək nahiyəsindən güllə yarası alaraq, yerindəcə həlak olub. Atası Fərman Məmmədov ağır yaralanıb.
Bakıda Larisa Məmmədovanın adını daşıyan küçə var. Hər il 20 Yanvar ərəfəsində təhsil aldığı 134 nömrəli məktəbdə Larisa ilə bağlı anım tədbirləri təşkil edilir. Larisanın xatirəsinə həsr olunan yazı, şeir, rəsm müsabiqələri keçirilir. Məktəbdə onun adını daşıyan şagird təşkilatı fəaliyyət göstərir.
Azərbaycanın Xalq şairi Bəxtiyar Vahabzadə Larisaya həsr edilən "On üç yaşlı körpə bala" şeirini yazıb.
Azərbaycan Respublikası Prezidentinin 31 mart 1998-ci il tarixli Fərmanı ilə Larisa Məmmədova və digər 146 şəhidə "20 Yanvar Şəhidi" fəxri adı verilib.
