Bakı Avrasiya Universitetində qiyabi təhsil alan tələbə sosial şəbəkədə auditoriyaların soyuq olmasından şikayət edib.
Tələbə bildirib ki, tədris ili ərzində cəmi üç həftə dərsə gəlmələrinə baxmayaraq, minimal tədris şəraiti təmin olunmur. Tələbələrin sözlərinə görə, dərslər keçirilən auditoriyalarda istilik sistemi işləmir və otaqlar dözülməz dərəcədə soyuq olur.
Şikayətdə qeyd edilir ki, tələbələr dərs zamanı üst geyimində oturmağa məcbur qalırlar. Bu vəziyyətin dağlıq kənd məktəblərindəki şəraitə bənzədiyi vurğulanır.
"İldə cəmi üç həftə dərsə gəlirik, amma həmin müddətdə də normal şərait yaradılmır. Buna baxmayaraq, illik 1500 manat təhsil haqqı ödəyirik. Ödəniş edildiyi halda, minimal tədris şəraitinin belə təmin olunmaması ciddi narahatlıq doğurur", – deyə tələbə bildirib.
Şikayətçi tələbə qeyd edib ki, mövcud şəraitdə normal və keyfiyyətli tədris prosesi mümkün deyil.
Bakı Avrasiya Universitetinin mətbuat xidmətinin rəhbəri Şəfayət Avılbəyli mövzu ilə bağlı azxeber.com-a açıqlamasında bildirib ki, universitetdə istilik tam təmin olunur:
"Universitetdə təxminən 4000 tələbə təhsil alır. İki qazanxana mövcuddur. Həmin qiyabi təhsil alan tələbənin hansı auditoriyada oturmasından mənim xəbərim yoxdur. Qiyabi təhsil alan tələbələr universitetdə 1 ay olur və 10 gün imtahan prosesində iştirak edirlər. Elə şey olar ki, universitetdə istilik təmin olunmasın? Bu mümkün deyil. İstilik yüksək səviyyədə təmin olunur".
