Bakının Səbail rayonunda 17 yaşlı oğlan atasını bıçaqlamaqda ittiham olunub.
2009-cu il təvəllüdlü Talıb atası Əfsərin sərxoş halda onu və bacılarını təhqir etdiyini, onlara qarşı zorakılıq göstərdiyini bildirib.
Təqsirləndirilən şəxsin ifadəsinə görə, hadisə gecə saatlarında baş verib. Atasının böyük bacısını dəmir stulla vurmaq istədiyini görən Talıb araya girib. Bu zaman atası stulla onun başına zərbə endirib. Talıb isə mətbəx bıçağı ilə atasının bel nahiyəsinə iki zərbə vurub.
O, ifadəsində atasının əvvəllər də içki qəbul etdikdən sonra ailə üzvlərinə qarşı zorakılıq göstərdiyini deyib.
Bakı Ağır Cinayətlər Məhkəməsinin hökmü ilə Talıb 3 il müddətinə azadlıqdan məhrum edilib. Lakin Cinayət Məcəlləsinin 70-ci maddəsi tətbiq olunaraq cəza şərti hesab edilib və 2 il sınaq müddəti müəyyənləşdirilib.
mənbə: demokrat.аz
