Bu gün Azərbaycan ədəbiyyatının görkəmli nümayəndəsi, xalq şairi, dramaturq, əməkdar incəsənət xadimi Nəriman Həsənzadənin doğum günüdür.
Bakuplus.az məlumat verir ki, xalq şairi 94 yaşını qeyd edir.
Nəriman Əliməmməd oğlu Həsənzadə 1931-ci il fevralın 18-də Qazax (indiki Ağstafa) rayonunun Poylu qəsəbəsində anadan olub.
Bir yaşında atasını, iyirmi üç yaşında isə anasını itirib.
İbtidai və orta təhsilini doğma rayonunda alıb. 1949-cu ildə Həsən Zərdabi adına Kirovabad Dövlət İnstitutunun (indiki Gəncə Dövlət Universitetinin) filologiya fakültəsinə daxil olub. 1953-cü ildə həmin universiteti bitirib. Moskvada M.Qorki adına Ədəbiyyat İnstitutunu bitirib.
1962-ci ildə Respublika Televiziya və Radio Verilişləri Komitəsində böyük redaktor, sonralar “Uşaq və gənclər ədəbiyyatı nəşriyyatı”nda redaktor, “Azərbaycan gəncləri” qəzetində, “Azərbaycan” jurnalında şöbə müdiri, “Ədəbiyyat və incəsənət” qəzetinin baş redaktoru vəzifələrində işləyib.
1991-2001-ci illərdə Mətbuat və İnformasiya nazirinin birinci müavini vəzifəsində çalışıb.
Prezident İlham Əliyevin Sərəncamı ilə 2005-ci ildə Azərbaycanın xalq şairi adına layiq görülüb.
2021-ci ildə isə ölkə başçısı Nəriman Həsənzadənin “İstiqlal” ordeni ilə təltif edilməsi haqqında sərəncam imzalayıb.
