Sakinlər Yeni Günəşli qəsəbəsindən hərəkət edən 20 nömrəli marşrut avtobuslarının sayının az olmasından şikayətçidir.
Bakuplus.az-ın məlumatına görə, sərnişinlər bildirir ki, axşam saatlarında avtobus tapmaq heç mümkün olmur.
Onların sözlərinə görə, həmin vaxtlar nəqliyyat vasitələri 1 saatdan bir işləyir və bəzi hallarda sərnişinlər 1 saatdan çox gözləməyə məcbur qalır.
"Dünən 1 saat yarım dayanacaqda gözlədim. Azərbaycan Yerüstü Nəqliyyat Agentliyi xalqın pulu ilə aldığı avtobusları xalqın mənfəəti üçün istifadəyə verməlidir. 20 nömrəli marşrut hər istiqamətdə daim dolu olur, özüm dəfələrlə şahidi olmuşam. Camaat səhərlər işə gecikir, axşamlar isə evə qayıda bilmir", – sakinlərdən biri bildirib.
Onlar bildirir ki, marşruta olan tələbat yüksəkdir, lakin avtobus sayı kifayət etmir. Sakinlər məsul qurumlardan problemin həlli üçün tədbir görülməsini istəyirlər.
