Bakı Apellyasiya Məhkəməsində dələduzluqda təqsirləndirilən Zahid Baxşıyevin barəsindəki hökmdən verilən apellyasiya şikayəti üzrə məhkəmə prosesi başa çatıb.
Məlumata görə, hakim Zamin İbrahimovun sədrliyi ilə keçirilən prosesdə qərar elan edilib.
İttihama görə, Zahid Baxşıyev 2015-ci ildə Bakı şəhərində yerləşən notariat kontorlarından birində zərərçəkmiş şəxs tərəfindən torpaq sahəsinin və əmlakının satılmasına köməklik göstərilməsi məqsədilə verilmiş etibarnamələrdən istifadə edib. O, zərərçəkmişin məlumatı və icazəsi olmadan ona məxsus mənzili 90 min manata satıb.
Bununla kifayətlənməyən təqsirləndirilən şəxs zərərçəkmişin məlumatı olmadan onun bank hesabından hissə-hissə ümumilikdə 20 min manat pul çıxarıb.
Zahid Baxşıyev daha sonra zərərçəkmiş şəxsin etibarından yenidən sui-istifadə edərək ondan 10 000 manat pul alıb.
Beləliklə, Zahid Baxşıyevə özgənin əmlakını etibardan sui-istifadə və aldatma yolu ilə ələ keçirməklə dələduzluq və təkrarən dələduzluq etmə ittihamı verilib.
Bakı Ağır Cinayətlər Məhkəməsinin hökmü ilə təqsirləndirilən şəxs 6 il 5 ay 27 gün müddətinə azadlıqdan məhrumetmə cəzasına məhkum edilib.
Hökmdən narazı qalan Zahid Baxşıyev və onun müdafiəçisi apellyasiya şikayəti verib.
Bakı Apellyasiya Məhkəməsinin qərarına əsasən Bakı Ağır Cinayətlər Məhkəməsinin hökmü dəyişdirilib və ona şərti cəza verilib. Zahid Baxşıyev məhkəmə iclas zalından azad olunub.
Mənbə: pravda.az
