Abşeron rayonu, Xırdalan şəhərində yerləşən AAAF Park yaşayış kompleksinin sakinləri zibil problemindən şikayətlənirlər.
Bakuplus.az -a müraciət edən vətəndaşların sözlərinə görə, əvvəllər binaların qarşısında zibil konteynerləri olub. Sonradan isə hamısı yığışdırılıb və yalnız kompleksin girişində bir konteyner saxlanılıb.
Sakinlər bildirirlər ki, bir konteyner bütün kompleks üçün kifayət etmir. Nəticədə zibil qabı tez-tez dolub-daşır, ətrafda xoşagəlməz vəziyyət yaranır.
Onlar aidiyyəti qurumlardan problemin həll olunmasını və əraziyə əlavə zibil konteynerlərinin qoyulmasını xahiş edirlər.
Məsələ ilə bağlı "AAAF Park" yaşayış kompleksi ilə əlaqa saxladıq. Zəngimizə cavabda bildirildi ki, əraziyə 14 konteyner qoyulub və onların sayının azaldılması qeyri-mümkündür. Sadəcə yerdəyişmə edilib.
"AAAF Park" yaşayış kompleksindən kənarda bizə aid olmayan həyət evləri var. Onların zibillərini uzun müddətdir biz atırıq. Biz də həmin zibil qablarını yığışdırdıq, bir az içəri tərəfə uzaqlaşdırdıq. Sakinlər 10 metr qabağa gedib zibilləri atmaq istəmir. Sakinlər bilərəkdən zibili həmin qablara atmırlar, kənara qoyurlar. Biz təmizlik yaratmaq istəyirik. Bəzən günah sakinlərin özündə olur. Binadan çıxanda zibili biri blokun, o biri qapını, digəri məscidin yanına qoyur. Hər gün biz bunları yığışdırırıq".
