Abşeron rayonunda ər-arvad arasında yaranan mübahisə dava ilə nəticələnib.
Demokrat.az xəbər verir ki, hadisə bu ilin yanvarın 17-də baş verib. Qazax rayon sakini, 1990-cı il təvəllüdlü Araz səhər saatlarında yaşadığı evdə həyat yoldaşı Zeynəblə (adlar şərtidir) mübahisə edib.
Mübahisəyə səbəb qadının xəstələnən 2022-ci il təvəllüdlü azyaşlı övladını valideynlərinin evinə aparmaq istəməsi, lakin ərinin buna etiraz etməsi olub.
Mübahisə zamanı Araz həyat yoldaşına hücum edib. O, əvvəlcə qadının saçından dartaraq onu təhqir edib, daha sonra isə əl və yumruq zərbələri ilə baş, üz və ağız nahiyəsinə vuraraq müxtəlif dərəcəli bədən xəsarətləri yetirib.
Faktla bağlı Araz barəsində Cinayət Məcəlləsinin 128-ci maddəsi (qəsdən sağlamlığa zərər vurma) ilə ittiham irəli sürülüb.
İşə Abşeron Rayon Məhkəməsində baxılıb. Məhkəmə zamanı tərəflər arasında barışıq əldə olunub və zərərçəkən şəxs şikayətini geri götürüb.
Bu səbəbdən məhkəmə Cinayət Məcəlləsinin 73.2-ci maddəsinə əsasən Arazı cinayət məsuliyyətindən azad edib və iş üzrə icraata xitam verilib.
