Abşeron rayonunda qısqanclıq zəminində anasını qətlə yetirməkdə təqsirləndirilən 2008-ci il təvəllüdlü Bəhruz Mirzəyevin cinayət işi üzrə məhkəmə hökmü elan olunub.
Demokrat.az xəbər verir ki, Bəhruz anası, 1986-cı il təvəllüdlü Solmazın ailəni tərk edərək başqa kişi ilə yaşamasını özünün və ailəsinin ləyaqətini alçaldan hərəkət kimi qiymətləndirib və qisas almaq qərarına gəlib.
O, 2025-ci ilin mart ayında anası ilə sosial şəbəkə vasitəsilə əlaqə saxlayaraq onu guya kirayə ev tapmaq bəhanəsi ilə Abşeron rayonu, Məmmədli kəndinə görüşə çağırıb. Bəhruz görüşə gedərkən özü ilə evdən mətbəx bıçağını da götürüb.
Saat 17 radələrində anası ilə görüşən yeniyetmə küçə ilə gəzdikləri zaman qadına çoxsaylı bıçaq zərbələri vurub. Solmaz aldığı xəsarətlərdən hadisə yerində ölüb.
İstintaq zamanı Bəhruz elan olunmuş ittiham üzrə özünü təqsirli bilib. O, ifadəsində bildirib ki, anasının ailəni tərk etməsi ilə barışa bilməyib və görüşə gedərkən onu öldürmək niyyətində olub. Onun sözlərinə görə, anası yenidən ailəyə qayıtmağa razılaşsaydı, cinayəti törətməyəcəkdi.
Bəhruz barəsində Cinayət Məcəlləsinin müvafiq maddəsi ilə ittiham irəli sürülüb.
Sumqayıt Ağır Cinayətlər Məhkəməsinin hökmü ilə o, 7 il 6 ay müddətinə azadlıqdan məhrum edilib və cəzasını ümumi rejimli tərbiyə müəssisəsində çəkməsi müəyyən olunub.
Qeyd edək ki, adlar şərtidir.
