"Azərbaycan Hava Yolları" aviaşirkətinin J2-8243 nömrəli Bakı-Qroznı reysini yerinə yetirən "Embraer 190" təyyarəsinin Qazaxıstanın Aktau şəhərinin yaxınlığında qəzaya uğramasından bir il keçir.
Bakuplus.az xəbər verir ki, 2024-cü il dekabr ayının 25-də "Embraer E190AR" təyyarəsi Xəzər dənizi üzərində "SOS" siqnalı verdikdən sonra məcburi eniş etmək üçün Qazaxıstana istiqamətlənib və Aktau aeroportu yaxınlığında qəzaya uğrayıb.
Faktla bağlı Azərbaycan, Qazaxıstan və Rusiyada cinayət işləri başlanıb. Hadisə ilə əlaqədar dekabrın 26-da Azərbaycanda, 28-də isə Çeçenistanda matəm elan edilib.
Dekabrın 28-də hadisə ilə bağlı Vladimir Putin Prezident İlham Əliyevə zəng edərək hadisənin Rusiyanın hava məkanında baş verməsinə görə üzrxahlıq edib.
Təyyarənin göyərtəsində 62 sərnişin, 5 ekipaj üzvü olmaqla, ümumilikdə 67 nəfər olub. Onlardan 38-i həlak olub.
Hava gəmisinin kapitanı İqor Kşnyakin, köməkçi pilot Aleksandr Kalyaninov, təyyarə bələdçilərindən isə Hökumə Əliyeva vəfat edənlər arasında olub. Onlar hadisə zamanı fədakarlıq göstərdiklərinə görə Azərbaycanın Milli Qəhrəmanı fəxri adına layiq görülüblər.
