"Biz artıq inkişaf etmiş ölkələr sırasına daxilik. Bəzi sahələrdə bunun təsirini görürük. Amma bu bizim qonorarımıza təsir etmir. Bilirsiniz ki, aktyorlar, tanınmış insanlar hər zaman göz önündə olurlar. Onların geyimləri, makiyajları xüsusi diqqət cəlb edir. Adi kosmetoloqlar belə özlərini reklam edəndə çalışırlar ki, tanınmış insanlardan istifadə etsinlər. Çox zaman bizim kimi tanınmış simalar dəbi yaradır. Bizlərdən dəb götürürlər. Bu hər zaman belə olub. Sovet dönəmində də düşünürdük ki, qonorarımız azdır. İndiki vəziyyətlə müqayisə etsək qonorarımız ümumiyyətlə azdır. Aktyorun, aktrisanın qonorarı ümumiyyətlə yüksək olmalıdır. Rusiyada, Türkiyədə çox yüksəkdir. Mən Rusiyada “Mosfilm”-də çəkilmişəm. Yüksək də qonorar veriblər. Adi tanınmayan aktyora belə külli miqdarda qonorar verirlər. Çünki aktyor günün 2 saatını həmin çəkilişə həsr edir. Xüsusilə brend aktyor və aktrisaların qonorarı yüksək olmalıdır”.
Bunu Moderator.az-a açıqlamasında xalq artisti Naibə Allahverdiyeva deyib.
Naibə Allahverdiyeva bildirib ki, həyat çox bahalaşıb: “Düzdür, sənət heç bir pulla, mal-mülklə olmur. Amma yaşamaq da lazımdır. Bunun üçün də pul mütləqdir. Əfsuslar olsun ki, bizə bu qonorarları vermirlər. Mən eşitdiyimə görə hətta seriallarda belə aktyorlar narazılıq edirlər. Onlar aylıq maaş alırlar. Bu da çox azdır. Heç zəhmətə dəyməz. Bir dəfə mən özüm də seriala çəkiləndə axşam saat 9-da çağırıb, səhərə yaxın saat 5-də buraxıblar. Çox əziyyətli bir işdir”.
Naibə Allahverdiyeva deyib ki, yüksək qonorar gözləntisi yoxdur:
“Vətənimizin tarixinə, qəhrəmanlara aid bir film olsa mən heç qonorar barəsində düşünmərəm də. Hansı ki, bu film vətənimizi bütün dünyada tanıdacaq. Nə qonorar versələr danışmaram. Azdır, çoxdur demərəm. Çünki bu film bizə başucalığı gətirəcəksə, bunun nəyi pisdir ki? Bizim üçün də şərəf olar. Sizə onu da deyim ki, ssenarist də, rejissor da, digər çəkiliş kollektivi də çox gözəl qonorar alır. Mən eşitdiyimə görə adi bir ssenarini 15-20 minə yazırlar, sizcə, aktyorun əziyyəti onlardan azdır? İşıqçısından tutmuş, geyim rəssamına qədər normal pul alır, aktyora pul verməyə əlləri gəlmir. Mənə elə gəlir ki, bu iş tənzimlənməlidir. Belə olmaz”.
