Bu gün Bakı Ağır Cinayətlər Məhkəməsində hakim Fəxri Məmmədovun sədrliyi ilə Bakıda qrup yoldaşını bıçaqlamaqda təqsirləndirilən Fərid Əliyevin cinayət işi üzrə məhkəmə prosesi keçirilib.
Lent.az xəbər verir ki, hadisə günü qeydə alınan video nümayiş etdirilib.
Dövlət ittihamçısı vəsatət verərək, təqsirləndirilən şəxs barədə təkrar kompleks psixoloji ekspertizanın keçirilməsini məhkəmədən istəyib. Dövlət ittihamçısı bu vəsatəti F.Əliyevin hadisəni törədərkən anlaqlı olub-olmamasının müəyyən olunması ilə bağlı əsaslandırıb.
Qısa müşavirədən sonra məhkəmə tərkibi vəsatətin təmin olunduğunu elan edib.
Növbəti proses 12 may saat 12:15-ə təyin edilib.
Xatırladaq ki, hadisə 2025-ci ilin avqustunda Bakıda baş verib.
Hadisəyə Fərid Əliyevin anası və tələbə yoldaşının mesajlaşdığı ilə bağlı iddialar səbəb olub. O, buna görə tələbə yoldaşı ilə mübahisə zamanı ona bıçaq zərbələri endirib.
İstintaq zamanı təqsirləndirilənin şübhələrinin təsdiqini tapmadığı bəlli olub.
Bildirilir ki, təqsirləndirilən Fərid Əliyev qəbul imtahanları zamanı 670 bal toplayaraq Xəzər Universitetinə qəbul olunub. Onun hadisəni törədən vaxt anlaqsız vəziyyətdə olduğu məlum olub. Buna görə də o, 1 saylı Ruhi-Əsəb Dispanserində məcburi müalicəyə cəlb olunub.
Fərid Əliyev Cinayət Məcəlləsinin müvafiq maddələri ilə ittiham olunub.
