Bakı Ağır Cinayətlər Məhkəməsində qəsdən sağlamlığa ağır zərər vurmaqda təqsirləndirilən İntiqam Tağıyevin (adı şərtidir) cinayət işi üzrə hökm oxunub.
Pravda.аz xəbər verir ki, hakim Babək Pənahovun sədrliyi ilə keçirilən prosesdə ona şərti cəza verilib.
Hadisə 3 yanvar 2025-ci ildə Qaradağ rayonu Sahil qəsəbəsində yerləşən yataqxanaların birində baş verib. İttihama görə, İntiqam Tağıyev yaşadığı evdə anası ilə pul üstündə mübahisə edib. Mübahisə zamanı əsəbiləşən şəxs mətbəxdən götürdüyü bıçaqla anasının kürəyindən bir dəfə zərbə vurub.
Məhkəmə-tibbi ekspertizasına əsasən, qadına yetirilən xəsarət döş qəfəsinə nüfuz edən, həyat üçün təhlükəli ağır bədən xəsarəti kimi qiymətləndirilib.
Təqsirləndirilən şəxsin sözlərinə görə, hadisədən əvvəl anası ona bayram münasibətilə 100 manat pul verəcəyini və həmin vəsaitlə özünə geyim almasını deyib. Ancaq sonradan bu vədi yerinə yetirməyib.
Zərərçəkmiş qadın xəstəxanaya çatdırılıb, hadisədən bir neçə saat sonra İntiqam Tağıyev polis tərəfindən saxlanılıb.
Məhkəmənin hökmü ilə ona şərti cəza verilib.
