Bakı Ağır Cinayətlər Məhkəməsində qəsdən sağlamlığa ağır zərər vurmada təqsirləndirilən Xəyal Məcidovun (ası, soyadı şərti) cinayət işi üzrə məhkəmə istintaqı başa çatıb.
Pravda.az-ın əldə etdiyi məlumata görə, hakim Leyla Əsgərova-Məmmədovanın sədrliyi ilə keçirilən prosesdə hökm oxunub.
İttihama görə, hadisə 2024-cü ildə Yasamal rayonu ərazisində qeydə alınıb.
2006-cı il təvəllüdlü Xəyal Məcidov tanışı, zərərçəkmiş Mahir İbrahimovla (adı, soyadı şərtidir) anası barədə xoşagəlməz ifadələr işlətməsi səbəbindən mübahisə edib. Bu zaman o, əvvəlcədən üzərində gəzdirdiyi bıçaqla zərərçəkmiş şəxsə bir neçə zərbə endirərək ona bədən xəsarətləri yetirib.
Məhkəmədə dindirilən Xəyal Məcidov özünü elan olunmuş ittiham üzrə qismən təqsirli bilib və ifadəsində göstərib ki, zərərçəkmiş Mahir İbrahimovun onun və anasının barəsində nalayiq ifadələr işlətdiyini eşidərək onunla görüşməyə gedib. Söhbət zamanı aralarında mübahisə yaranıb. Onun dediyinə görə, zərərçəkmiş şəxsin çiyninə bıçaqla vurmaq istəyib, lakin zərbə boyun nahiyəsinə dəyib.
Təqsirləndirilən şəxs cinayət aləti olan bıçağı itilətməyə apardığını, məhəllədə olan şəxslərdən Mahirin anası barədə nalayiq sözlər işlətdiyini eşidib. Buna görə də əsəbiləşərək onu bıçaqla vurub.
Məhkəmənin hökmü ilə təqsirləndirilən şəxs 2 il 11 ay 28 gün müddətində azadlıqdan məhrum edilib və iclas zalında həbs olunub.
