Azərbaycan Respublikası Dövlət Neft Fondu (ARDNF) ölkənin strateji maliyyə ehtiyatlarını idarə edən əsas qurumlardan biri olmaqla yanaşı, qlobal investisiya imkanlarından səmərəli istifadə edərək milli iqtisadiyyatın dayanıqlı inkişafına töhfə verir. Neft-qaz gəlirlərinin şəffaf və səmərəli idarə olunması istiqamətində nümunəvi bir model ortaya qoyan fond, eyni zamanda, qlobal maliyyə bazarlarında fəal iştirak etməklə Azərbaycanın beynəlxalq iqtisadi proseslərdə mövqeyini gücləndirir.
AZƏRTAC xəbər verir ki, bu istiqamətdə atılan növbəti addım isə ABŞ-da yerləşən və beynəlxalq maliyyə dünyasının ən nüfuzlu oyunçularından biri olan "BlackRock"un tərkibində fəaliyyət göstərən "Global Infrastructure Partners" (GIP) investisiya şirkəti ilə əməkdaşlıq çərçivəsində Böyük Britaniyanın strateji əhəmiyyətə malik hava nəqliyyatı qovşaqlarından biri – Londonun Qatvik hava limanına 50 milyon funt sterlinq dəyərində investisiyanın həyata keçirilməsi oldu.
Böyük Britaniyanın paytaxtına yaxın ərazidə yerləşən Londonun Qatvik hava limanı, ölkənin ikinci ən böyük və Avropanın ən işlək hava nəqliyyat mərkəzlərindən biridir. Hər il 40 milyondan artıq sərnişinə xidmət göstərən Qatvik, 200-dən çox beynəlxalq istiqamətə birbaşa uçuşlar həyata keçirərək, qlobal hava əlaqələrinin mühüm qovşağı rolunu oynayır. 2024-cü ildə sərnişin dövriyyəsinə görə Avropanın ən işlək 10 hava limanı sırasına daxil olan Qatvik, uzun illər ərzində Avropanın ən işlək bir zolaqlı hava limanı kimi tanınıb. Bu göstərici onun əməliyyat səmərəliliyini və güclü idarəetmə modelini nümayiş etdirir.
Hazırda Böyük Britaniya Hökumətinin Şimal Uçuş Zolağı layihəsini təsdiqləməsi ilə Qatvik, böyük infrastruktur genişlənməsi mərhələsinə qədəm qoyub. Yeni uçuş zolağının istifadəyə verilməsi ilə hava limanının illik sərnişin tutumunun 2030-cu illərin sonunadək 75 milyona çatacağı gözlənilir. Bu genişlənmə həm Qatvikin fəaliyyət miqyasını artıracaq, həm də Birləşmiş Krallığın hava nəqliyyatı şəbəkəsində strateji rolunu daha da gücləndirəcək.
Qeyd etmək lazımdır ki, Qatvik hava limanı yalnız beynəlxalq uçuşlar üçün mühüm qovşaq deyil, həm də ölkənin logistika və nəqliyyat sisteminin ayrılmaz hissəsi kimi Böyük Britaniyanın regional iqtisadi inteqrasiyasına və dayanıqlı inkişafına töhfə verir. Hava limanı ölkə iqtisadiyyatına hər il milyardlarla funt sterlinq dəyərində töhfə verir və eləcə də, turizm, logistika, ticarət və xidmət sektoru üçün güclü stimullaşdırıcı rol oynayır. Qatvikin fəaliyyətində davamlılıq və enerji səmərəliliyi prinsiplərinin tətbiqi onu həm iqtisadi, həm də ekoloji baxımdan müasir infrastruktur nümunəsinə çevirir.
ARDNF üçün bu layihə maliyyə gəlirliliyi ilə yanaşı, strateji investisiyaların gücləndirilməsi, həmçinin fondun uzunmüddətli, sabit gəlir gətirən infrastruktur aktivlərinə yönəlmə siyasətinin uğurlu nümunəsidir. Bu sərmayə ilə ARDNF Avropa bazarında dayanıqlı aktivlər portfelini genişləndirərək risklərin şaxələndirilməsi və gəlirlərin sabitləşdirilməsi istiqamətində strateji addım atıb.
"BlackRock" və onun tərkibindəki GIP kimi qurumlarla əməkdaşlıq, Azərbaycanın beynəlxalq nüfuzunu artırmaqla yanaşı, gələcəkdə digər böyük investisiya layihələrinə çıxış imkanlarını da genişləndirir. Bu, həm də ARDNF-in beynəlxalq səviyyədə etibarlı və peşəkar investor kimi tanınmasına xidmət edir.
Digər bir aspekt isə bu investisiyanın Azərbaycanın davamlı iqtisadi inkişaf strategiyasına uyğunluğu ilə bağlıdır. Qatvik hava limanının genişlənməsi, yalnız Böyük Britaniya iqtisadiyyatına deyil, bu layihədə iştirak edən tərəfdaşlara da əlavə dəyər yaradır ki, bu da ARDNF-in səmərəli və məsuliyyətli investor rolunu bir daha təsdiqləyir.
ARDNF son illərdə infrastruktur aktivlərinə yönəlmiş investisiya portfelini ardıcıl şəkildə genişləndirərək, enerji, nəqliyyat, logistika və sosial infrastruktur sahələrində beynəlxalq təcrübəyə malik tərəfdaşlarla əməkdaşlığa üstünlük verir. Qatvik investisiyası da məhz sabit və uzunmüddətli gəlir və sosial-iqtisadi dəyər təmin edən real aktivlərə yönəlmiş strateji yanaşmanın bariz nümunəsidir. Bu layihə, həmçinin ARDNF-in davamlı inkişaf məqsədlərinə sadiqliyini əks etdirir. Fond təkcə maliyyə gəlirliliyinə deyil, həm də iqtisadi dəyər yaradan, strateji əhəmiyyət daşıyan və beynəlxalq tərəfdaşlıq imkanlarını genişləndirən layihələrə sərmayə qoymaqla, məsuliyyətli və etibarlı investor kimi beynəlxalq nüfuzunu daha da möhkəmləndirir.
Qeyd edək ki, Qatvik hava limanı "VINCI Airports" (50,01 faiz), "Global Infrastructure Partners", ARDNF və digər beynəlxalq institusional investorlar tərəfindən birgə idarə olunur. Bu tərəfdaşlıq modeli beynəlxalq infrastruktur idarəçiliyində sinerji yaradan və riskləri optimal şəkildə bölüşdürən uğurlu təcrübə hesab olunur. "VINCI Airports"un hava limanı əməliyyatlarında çoxillik təcrübəsi, GIP-nin kapital idarəçiliyi üzrə qlobal bacarığı və ARDNF-in uzunmüddətli investisiya strategiyası birləşərək, Qatvikin dayanıqlı və səmərəli idarə edilməsini təmin edir.
Beləliklə, ARDNF-in bu kimi addımları Azərbaycanın iqtisadi diplomatiyasının və investisiya strategiyasının uğurlu tətbiqinin bariz göstəricisi olmaqla Azərbaycanın neft kapitalının səmərəli idarə olunaraq, gəlir gətirən beynəlxalq aktivlərə çevrilməsini təmin edir və ölkənin uzunmüddətli iqtisadi təhlükəsizliyinə mühüm töhfə verir.
