Bakıda qəsdən adam öldürməyə cəhddə təqsirləndirilən Elnur Əliyevin barəsindəki qərardan kassasiya şikayəti verilib.
Pravda.az-ın əldə etdiyi məlumata görə, hazırda şikayət Ali Məhkəmədə Zaur Hüseynovun sədrliyi ilə araşdırılır.
İttihama görə, hadisə 2024-cü il mayın 17-də Sabunçu qəsəbəsi, Şəhər şosesi, 3 ünvanında yerləşən evdə baş verib.
Hadisədən iki gün sonra cinayəti törətməkdə şübhəli bilinən Ağcabədi rayon sakini, əvvəllər məhkum olunmuş 28 yaşlı Elnur Əliyev saxlanılıb.
İstintaqla müəyyən edilib ki, Elnur Əliyev arvadı Elminaz Əliyevaya zəng edərək qonaq getdiyi anasıgildən geri çağırıb. Yoldaşı onunla birgə yaşamaq istəmədiyini və ayrılmaq niyyətini bildirdikdə aralarında mübahisə başlayıb. Qisas almaq niyyəti ilə qadını öldürmək qərarına gələn Elnur Əliyev qayınanası gilə gedib. Aqressiv şəkildə arvadını çağırıb, ondan çölə çıxmasını tələb edib. Arvadının nənəsi ondan səs-küy salmayıb, çıxıb getməsini tələb etdikdə, yumruqla qadının üzünə zərbə vurub. Qonşuları köməyə çağırmaqdan ötrü həyətə çıxan baldızının arxasınca qaçaraq onun boynundan tutub və üzərindəki bıçaqla 4 dəfə zərbə endirib. Sonra arvadının üzərinə hücum çəkib. Onu arxası üstə yerə yıxıb bıçağı göstərərək başını kəsəcəyi ilə hədələyib. Qadının baş nahiyəsinə və döş qəfəsinə 2 dəfə zərbə vurub. Nənəsi onun əlindəki bıçağın tiyəsindən tutub, mane olmağa çalışanda, qadının sol əlinin 3 barmağı kəsilib. Daha sonra kürəyinə də zərbə endirib.
Baldızı suqabını onun başına çırpanda yerə yıxılıb və qonşuların gəldiyini görərək hadisə yerindən qaçıb.
Zərərçəkmiş şəxslər vaxtında Sabunçu Tibb Mərkəzinə çatdırılaraq həyatları xilas olunub.
Bakı Ağır Cinayətlər Məhkəməsinin hökmü ilə Elnur Əliyev cəzasını ciddi rejimli cəzaçəkmə müəssisəsində çəkməklə 16 il müddətinə azadlıqdan məhrum olunub.
