Qəsdən sağlamlığa yüngül zərər vurmaqda təqsirləndirilən Qasım Maqsudovun (adı, soyadı şərtidir - red.) cinayət işi üzrə məhkəmə istintaqı yekunlaşıb.
Hakim Kamal Babayevin sədrliyi ilə keçirilən iclasda hökm oxunub və müttəhimə 1 000 manat cərimə təyin edilib.
İttihama görə, Qasım Maqsudov həyat yoldaşı Zəranə Maqsudovanı (adı, soyadı şərtidir - red.) mübahisə zamanı vurub. Nəticədə qadın yüngül dərəcəli xəsarət alıb.
Məhkəmədə Q.Maqsudov özünü qismən təqsirli bilib. O bildirib ki, həyat yoldaşı ilə əmlak məsələləri, o cümlədən yaşadıqları evin və digər mülklərin uşaqların adına keçirilməsi ilə bağlı mübahisələri olub.
Q.Maqsudovun sözlərinə görə, 2025-ci ilin dekabrında Zəranə evdə 100 min manat pul olduğunu və həmin vəsaitin götürüldüyünü deyib. Hadisə günü bu məsələ ilə bağlı yenidən mübahisə yaranıb və qadın onun üzünə tüpürərək nalayiq söz deyib. O isə əsəbiləşərək həyat yoldaşının sifətinə bir dəfə sillə vurub.
Təqsirləndirilən şəxs bildirib ki, qadın yıxılaraq paltar dolabına dəyib, daha sonra isə onu əli ilə itələyib. Hadisədən sonra qadın ərinin valideynlərini evə çağırıb.
Q.Maqsudov məhkəmədə evdə 100 min manat pul olmadığını da bildirib.
mənbə: pravda.az
