Bakının Xətai rayonunda ər arvadına xəsarət yetirib.
Hadisə cütlüyün birgə yaşadığı mənzildə baş verib.
Neftçala rayon sakini, 1988-ci il təvəllüdlü Mübariz həyat yoldaşı Südabə ilə mübahisə edib.
Mübahisəyə səbəb yaşadıqları mənzilin kirayə haqqının vaxtında ödənilməməsi olub. Belə ki, Mübariz kirayə haqqını gecikdirdiyi üçün ev sahibi tez-tez mənzilin qapısını döyərək ödənişi tələb edib. Qadın buna görə ərini günahlandırıb.
Mübariz isə əsəbiləşərək həyat yoldaşının baş nahiyəsinə əli ilə bir neçə dəfə zərbə endirib və ona müxtəlif dərəcəli bədən xəsarətləri yetirib.
Faktla bağlı Cinayət Məcəlləsinin qəsdən sağlamlığa yüngül zərər vurma maddəsi ilə cinayət işi başlanılıb.
İş üzrə ifadə verən Mübariz ona elan olunmuş ittiham üzrə özünü təqsirli bilib. O, həyat yoldaşı ilə barışdığını bildirib.
Südabə də ifadəsində əri ilə barışdığını təsdiqləyib və ona qarşı heç bir şikayət və tələbinin olmadığını deyib.
Xətai Rayon Məhkəməsinin hökmü ilə cinayət işi üzrə icraata xitam verilib. Mübariz cinayət məsuliyyətindən azad olunub.
Qeyd edək ki, adlar şərti verilib.
