Bakının Sabunçu rayonunda 1980-ci il təvəllüdlü Tahir qeyri-rəsmi münasibətdə olduğu Kəmaləyə (adlar şərtidir – red.) xəsarət yetirib.
Demokrat.аz xəbər verir ki, hadisə ötən ilin martın 15-də cütlüyün yaşadığı evdə baş verib. Qonaq otağında onlar arasında ailə-məişət zəminində mübahisə yaranıb. Mübahisə zamanı Tahir masanın üzərində olan televizor pultunu götürərək Kəmalənin baş nahiyəsinə bir dəfə zərbə vurub.
Tahirə Cinayət Məcəlləsinin 128-ci maddəsi ilə ittiham elan edilib. O, ifadəsində bildirib ki, təxminən 25 il öncə Kəmalə ilə qeyri-rəsmi ailə həyatı qurublar, onların bu evlilikdən üç övladı olub. Tahir son vaxtlar yoldaşı ilə tez-tez mübahisə etdiklərini və hadisə günü də əsəbiləşərək qapıya yumruq vurduğunu deyib. Bu zaman Kəmalənin nalayiq sözlərini eşidib və pultla qadının başına zərbə endirib.
Sabunçu Rayon Məhkəməsinin hökmü ilə Tahir 7 ay 20 gün müddətinə azadlığın məhdudlaşdırılması cəzası alıb. Ona elektron nəzarət vasitəsi daşımaq cəzası ilə yanaşı, gecə saatlarında evdən çıxmaq, Bakı şəhərini tərk etmək və kütləvi tədbirlərdə iştirak etmək qadağan olunub.
