Bakıda 7A nömrəli avtobusun salonunda sərnişinin üzərinə tavandan su axıb.
Bakuplus.az xəbər verir ki, bununla bağlı sərnişin sosial şəbəkə hesabında paylaşım edib.
O bildirib ki, Əhmədlidən Bakı Dəmiryol Vağzalına gedərkən avtobusda pəncərə kənarında oturub. Sərnişin təxminən bir saat ərzində yolboyu tavandan damcılayan sudan qorunmaq üçün aldığı kitabın paketini başının üzərinə tutub.
Bakuplus.az-ın sorğusuna "Bakubus"dan bildirildi ki, 7A nömrəli müntəzəm marşrut xətti üzrə hərəkət edən avtobuslardan birinin soyutma sisteminin drenaj xəttində texniki nasazlıq yaranıb:
"Sürücü nasazlıq barədə məlumat aldıqdan sonra avtobusun dövriyyəsini tamamlayaraq sərnişinləri son dayanacağa çatdırıb və nəqliyyat vasitəsini texniki baxış və təmir üçün depoya təhvil verib.
Hazırda nasazlığın aradan qaldırılması istiqamətində müvafiq işlər aparılır. Sərnişindaşıma xidmətində fasilənin yaranmaması üçün nasaz avtobus operativ şəkildə digər nəqliyyat vasitəsi ilə əvəz olunub".
