Yasamal Rayon Məhkəməsində qəsdən sağlamlığa yüngül zərər vurmaqda təqsirləndirilən Məmməd Əkbərovun (adı, soyadı şərtidir) cinayət işi üzrə istintaq yekunlaşıb.
Pravda.az xəbər verir ki, ittihama görə, hadisə bu il paytaxtın Yasamal rayonu, Əsəd Əhmədov küçəsində, "Şərur" MTK-nın zirzəmisində qeydə alınıb.
Belə ki, avtoyuma məntəqəsində çalışan Zamiq Bəkirov (adı, soyadı şərtidir) Məmməd Əkbərova məxsus "Renault" markalı avtomobili vaxtında yumadığı üçün aralarında mübahisə yaranıb və müştəri ona şillə vurub.
Hadisədən sonra Məmməd Əkbərov saxlanılaraq cinayət məsuliyyətinə cəlb edilib. Məhkəmədə zərərçəkmiş təqsirləndirilən şəxslə barışıb və ondan şikayətçi olmayıb
Hakim Mirsadiq Seyidovun sədrliyi ilə keçirilən prosesdə hökm oxunub.
Məhkəmənin hökmü ilə Məmməd Əkbərov cinayət məsuliyyətindən azad edilib və barəsində olan cinayət işinin icraatına xitam verilib.
