Bir müddət əvvəl İdman.Biz Azərbaycan mətbuatında ilk dəfə şəxsi evinin həyətini uşaqlar üçün futbol meydançasına çevirən Zakir Əliyevlə hazırladığı geniş müsahibəni oxucularına təqdim etmişdi. Müsahibə dərc ediləndən dərhal sonra oxucuların və ölkənin idman ictimaiyyətinin böyük marağına səbəb oldu.
Beləliklə, futbola böyük həvəs və məhəbbətlə yanaşan Zakir Əliyevin cəhdi diqqətdən kənarda qalmayıb. Bu gün onun yaratdığı kiçik stadionu futbol üzrə Azərbaycan milli futbol komandasının baş məşqçisi Ayxan Abbasov ziyarət edib.
Bu barədə İdman Zakir Əliyev özü məlumat verib.
O bildirib ki, milli komandamızın baş məşqçisi ilə bərabər AFFA-nın Kütləvi Futbol Departamentinin rəhbəri Fərrux İsmayılov, "Qarabağ"ın sabiq futbolçusu İlqar Qurbanov, eləcə də "Araz-Naxçıvan" klubunun futbolçuları Kürdaxanıda olublar. Qonaqlar uşaqlara 10 futbol topu, idman geyimləri və məşq ləvazimatları hədiyyə ediblər.
Gənc futbolçular "Araz-Naxçıvan" oyunçuları ilə birgə məşq ediblər, xatirə şəkilləri çəkdiriblər və Ayxan Abbasovla söhbət imkanı qazanıblar.
"Uşaqlar inanılmaz dərəcədə motivasiyalı və ruh yüksəkliyi içində idilər. Onlar üçün bu, həqiqətən unudulmaz və xoşbəxt bir gün idi. Sabah Azərbaycan və İslandiya yığmaları arasında oyun keçiriləcəyi üçün Ayxan Abbasov uzun müddət qala bilmədi, amma məşqi izləməyə vaxt tapdı. O dedi ki, bu həyətdən doğrudan da gələcəyin peşəkar futbolçuları yetişə bilər, bizə uğurlar arzuladı" - Zakir Əliyev bildirib.
Kürdaxanıdan olan məşqçinin sözlərinə görə, bu ziyarət onun yetirmələri ilə yanaşı, özü üçün də çox önəmli hadisə olub. O, həmçinin yaxın zamanda Gənclər və İdman Nazirliyinin dəstəyi ilə meydançaya yeni örtük çəkildiyini qeyd edib.
"Mənim fəaliyyətimin işıqlandırıldıqdan sonra belə bir nəticə əldə olunmasına görə çox minnətdaram. Düzünü desəm, AFFA nümayəndələrinin və milli komandanın baş məşqçisinin bizə gələcəyini eşidəndə sevincimdən az qala ürəyim yerindən çıxacaqdı. Əmək və zəhmətimin dəyərləndirildiyini görmək çox xoşdur. Bu, futbola daha çox töhfə vermək və uşaqlara peşəkar karyera yolunda dəstək olmaq üçün mənə əlavə motivasiya verdi".
Leyla Eminova
